3. пат̣хамасиккхама̄насиккха̄падаван̣н̣ана̄

татийе две васса̄нӣти пава̄ран̣а̄васена две сам̣ваччхара̄ни. чхасу дхаммесӯти па̄н̣а̄типа̄та̄вераман̣иа̄дӣсу вика̄лабходжана̄вераман̣ипарийоса̄несу чхасу сиккха̄падесу. асиккхитасиккханти падабха̄джане (па̄чи. 1077) вуттанайенева адиннасиккхам̣ ва̄ купитасиккхам̣ ва̄. сиккхама̄нам̣ вут̣т̣ха̄пеййа̄ти тесу чхасу дхаммесу сиккханато, те ва̄ сиккха̄сан̇кха̄те дхамме ма̄нанато евам̣ладдхана̄мам̣ анупасампаннам̣ упасампа̄деййа. па̄читтийанти пат̣хамасиккха̄паде вуттанайенева каммава̄ча̄парийоса̄не па̄читтийам̣.

са̄ваттхийам̣ самбахула̄ бхиккхунийо а̄раббха еварӯпам̣ сиккхама̄нам̣ вут̣т̣ха̄панаваттхусмим̣ пан̃н̃аттам̣, дхаммакамме тикапа̄читтийам̣, адхаммакамме тикадуккат̣ам̣. две васса̄ни чхасу дхаммесу сиккхитасиккхам̣ сиккхама̄нам̣ вут̣т̣ха̄пентийа̄, умматтика̄дӣнан̃ча ана̄патти. вуттанайена асиккхитасиккхата̄, дхаммакаммата̄, каммава̄ча̄парийоса̄нанти има̄неттха тӣн̣и ан̇га̄ни. самут̣т̣ха̄на̄дӣни пат̣хаме вуттанайа̄нева̄ти.

пат̣хамасиккхама̄насиккха̄падаван̣н̣ана̄ нит̣т̣хита̄.