5. куламаччхаринӣсиккха̄падаван̣н̣ана̄

пан̃чаме куле маччхаро куламаччхаро, куламаччхаро етисса̄ аттхи, кулам̣ ва̄ маччхара̄йатӣти куламаччхаринӣ. асса̄ти йа̄ ӣдисӣ бхавеййа. па̄читтийанти тасса̄ ‘‘йам̣ кулам̣ бхиккхунӣнам̣ паччайе да̄тука̄мам̣, катхам̣ на̄ма таттха бхиккхунийо на гаччхеййу’’нти бхиккхунӣнам̣ ва̄ сантике куласса, ‘‘катхам̣ на̄ма име та̄сам̣ кин̃чи на даджджеййу’’нти куласса ва̄ сантике бхиккхунӣнам̣ аван̣н̣ам̣ бха̄сантийа̄ па̄читтийам̣.

са̄ваттхийам̣ ан̃н̃атарам̣ бхиккхуним̣ а̄раббха куламаччхара̄йанаваттхусмим̣ пан̃н̃аттам̣. амаччхара̄йитва̄ сантам̣йева а̄дӣнавам̣ а̄чиккхантийа̄, умматтика̄дӣнан̃ча ана̄патти. бхиккхунӣнам̣ ала̄бхака̄мата̄, куласса ва̄ сантике бхиккхунӣнам̣ бхиккхунӣнам̣ ва̄ сантике куласса аван̣н̣абхан̣ананти има̄неттха две ан̇га̄ни. самут̣т̣ха̄на̄дӣни адинна̄да̄насадиса̄ни, идам̣ пана дуккхаведананти.

куламаччхаринӣсиккха̄падаван̣н̣ана̄ нит̣т̣хита̄.