4. сан̇гха̄т̣ича̄расиккха̄падаван̣н̣ана̄

чатуттхе пан̃ча аха̄ни пан̃ча̄хам̣, пан̃ча̄хамева пан̃ча̄хикам̣. сан̇гха̄т̣ӣнам̣ ча̄ро сан̇гха̄т̣ича̄ро, парибхогавасена ва̄ ота̄панавасена ва̄ сан̇гхат̣итат̣т̣хена ‘сан̇гха̄т̣ӣ’ти ладдхана̄мам̣ тичӣварам̣, удакаса̄т̣ика̄, сам̣каччика̄ти имесам̣ пан̃чаннам̣ чӣвара̄нам̣ париваттананти аттхо. атикка̄меййа па̄читтийанти чхат̣т̣хе арун̣уггамане екасмим̣ чӣваре вуттанайена апариваттите ека̄ а̄патти, пан̃часу пан̃ча.

са̄ваттхийам̣ самбахула̄ бхиккхунийо а̄раббха чӣварам̣ никкхипитва̄ сантаруттарена джанападача̄рикам̣ паккаманаваттхусмим̣ пан̃н̃аттам̣, тикапа̄читтийам̣, пан̃ча̄ха̄натикканте двикадуккат̣ам̣. тасмим̣ пана анатиккантасан̃н̃а̄йа, пан̃чамам̣ дивасам̣ пан̃ча чӣвара̄ни нива̄сентийа̄ ва̄ па̄рупантийа̄ ва̄ ота̄пентийа̄ ва̄, гила̄на̄йа, ‘‘идам̣ ме чӣварам̣ махаггхам̣ ӣдисе чорабхайе на сакка̄ дха̄рету’’нти еварӯпа̄су а̄пада̄су, умматтика̄дӣнан̃ча ана̄патти. пан̃чаннам̣ чӣвара̄нам̣ ан̃н̃атарата̄, пан̃ча̄ха̄тиккамо, анун̃н̃а̄така̄ран̣а̄бха̄во, апариваттананти има̄неттха чатта̄ри ан̇га̄ни. самут̣т̣ха̄на̄дӣни катхинасадиса̄нӣти.

сан̇гха̄т̣ича̄расиккха̄падаван̣н̣ана̄ нит̣т̣хита̄.