7. джа̄лийасуттаван̣н̣ана̄

двепаббаджитаваттхуван̣н̣ана̄

378. ‘‘гхоситена сет̣т̣хина̄ кате а̄ра̄ме’’ти ватва̄ таттха койам̣ гхоситасет̣т̣хи на̄ма, катхан̃ча̄нена а̄ра̄мо ка̄рито, катхам̣ ва̄ таттха бхагава̄ виха̄сӣти там̣ саббам̣ самуда̄гамато пат̣т̣ха̄йа сан̇кхепатова дассетум̣ ‘‘пуббе кира̄’’тиа̄ди вуттам̣. татоти аллакаппарат̣т̣хато. тада̄ти тесам̣ там̣ га̄мам̣ павит̣т̣хадивасе. балавапа̄йа̄санти гарутарам̣ бахупа̄йа̄сам̣. асаннихитети гехато бахи гате. бхуссатӣти равати. гхосакадевапуттотвева на̄мам̣ ахоси сарагхосасампаттийа̄. веййаттийена̄ти пан̃н̃а̄веййаттийена. гхоситасет̣т̣хи на̄ма джа̄то та̄йа ева часса сарасампаттийа̄ гхоситана̄мата̄.

сарӣрасантаппанаттханти химаванте пхаламӯла̄ха̄рата̄йа килантасарӣра̄ лон̣амбиласеванена тасса сантаппанаттхам̣ пӣнанаттхам̣. тасита̄ти пипа̄сита̄. киланта̄ти париссантака̄йа̄. те кира там̣ ват̣аруккхам̣ патва̄ тасса собха̄сампаттим̣ дисва̄ маха̄нубха̄ва̄ ман̃н̃е еттха адхиваттха̄ девата̄, ‘‘са̄дху вата̄йам̣ девата̄ амха̄кам̣ аддха̄напариссамам̣ винодеййа̄’’ти чинтесум̣, тена вуттам̣ ‘‘таттха адхиваттха̄…пе… нисӣдим̣сӯ’’ти. соти ана̄тхапин̣д̣ико гахапати. бхатака̄нанти бхатийа̄ веййа̄ваччам̣ каронта̄нам̣ да̄сапесакаммакара̄нам̣. пакатибхаттаветананти пакатийа̄ да̄таббабхаттаветанам̣, тада̄ упосатхикатта̄ каммам̣ акаронта̄нампи каммакаран̣адивасена да̄таббабхаттаветанамева̄ти аттхо. кан̃чӣти кан̃чипи бхатакам̣.

упечча парасса ва̄ча̄йа а̄рамбханам̣ ба̄дханам̣ упа̄рамбхо, досадассанавасена гхат̣т̣ананти аттхо, тена̄ха ‘‘упа̄рамбха̄дхиппа̄йена ва̄дам̣ а̄ропетука̄ма̄ хутва̄’’ти. ваданти нинданавасена катхенти етена̄ти хи ва̄до, досо. там̣ а̄ропетука̄ма̄, патит̣т̣ха̄петука̄ма̄ хутва̄ти аттхо. ‘‘там̣ джӣвам̣ там̣ сарӣра’’нти, идха йам̣ ваттхум̣ джӣвасан̃н̃итам̣, тадева сарӣрасан̃н̃итанти ‘‘рӯпам̣ аттато саманупассатӣ’’ти ва̄дам̣ гахетва̄ ваданти. рӯпан̃ча атта̄нан̃ча адвайам̣ катва̄ саманупассанавасена ‘‘сатто’’ти ва̄ ба̄хиракапарикаппитам̣ атта̄нам̣ сандха̄йа ваданти. бхиджджатӣти нирудайавина̄савасена винассати. тена джӣвасарӣра̄нам̣ анан̃н̃атта̄нуджа̄нанато, сарӣрасса ча бхедадассанато. на хеттха йатха̄ бхедавата̄ сарӣрато анан̃н̃атта̄ адит̣т̣хопи джӣвасса бхедо вутто, евам̣ адит̣т̣хабхедато анан̃н̃атта̄ сарӣрасса̄пи абхедоти сакка̄ вин̃н̃а̄тум̣ тасса бхедасса паччаккхасиддхатта̄, бхӯтупа̄да̄йарӯпавинимуттасса ча сарӣрасса абха̄ватоти а̄ха ‘‘уччхедава̄до хотӣ’’ти.

‘‘ан̃н̃ам̣ джӣвам̣ ан̃н̃ам̣ сарӣра’’нти ан̃н̃адева ваттхум̣ джӣвасан̃н̃итам̣, ан̃н̃ам̣ ваттхум̣ сарӣрасан̃н̃итанти ‘‘рӯпавантам̣ атта̄нам̣ саманупассатӣ’’тиа̄динайаппаваттам̣ ва̄дам̣ гахетва̄ ваданти. рӯпе бхедасса дит̣т̣хатта̄, аттани ча тадабха̄вато атта̄ ниччоти а̄паннамева̄ти а̄ха ‘‘тумха̄кам̣…пе… а̄паджджатӣ’’ти.

379-380. тайидам̣ несам̣ ван̃джха̄сутасса дӣгхарассата̄парикаппанасадисанти катва̄ т̣хапанӣйойам̣ пан̃хоти таттха ра̄джанимӣланам̣ катва̄ саттха̄ упари несам̣ ‘‘тена ха̄вусо сун̣а̄тха̄’’тиа̄дина̄ дхаммадесанам̣ а̄рабхӣти а̄ха ‘‘атха бхагава̄’’тиа̄ди. тасса̄ йева̄ти маджджхима̄йа пат̣ипада̄йа.

саддха̄паббаджитасса̄ти саддха̄йа паббаджитасса ‘‘евамахам̣ ито ват̣т̣адуккхато ниссарисса̄мӣ’’ти евам̣ паббаджджам̣ упагатасса таданурӯпан̃ча сӣлам̣ пӯретва̄ пат̣хамаджджха̄нена сама̄хитачиттасса. етам̣ ваттунти етам̣ килесават̣т̣апарибуддхидӣпанам̣ ‘‘там̣ джӣвам̣ там̣ сарӣра’’нтиа̄дикам̣ дит̣т̣хисам̣килесанисситам̣ вачанам̣ ваттунти аттхо. ниббичикиччхо на хотӣти дхаммесу тин̣н̣авичикиччхо на хоти, таттха таттха а̄саппанапарисаппанавасена паваттатӣти аттхо.

етамевам̣ джа̄на̄мӣти йена со бхиккху пат̣хамам̣ джха̄нам̣ упасампаджджа вихарати, етам̣ сасампайуттадхаммам̣ читтанти евам̣ джа̄на̄ми. но ча евам̣ вада̄мӣти йатха̄ дит̣т̣хигатика̄ там̣ дхаммаджа̄там̣ саниссайам̣ абхедато ган̣ханта̄ ‘‘там̣ джӣвам̣ там̣ сарӣра’’нти ва̄ тадубхайам̣ бхедато ган̣ханта̄ ‘‘ан̃н̃ам̣ джӣвам̣ ан̃н̃ам̣ сарӣра’’нти ва̄ аттано миччха̄га̄хам̣ паведенти, ахам̣ пана на евам̣ вада̄ми тасса дхаммасса супарин̃н̃а̄татта̄, тена̄ха ‘‘атха кхо’’тиа̄ди. ба̄хирака̄ йебхуййена касин̣аджджха̄на̄ни ева ниббаттентӣти а̄ха ‘‘касин̣апарикаммам̣ бха̄вантесса̄’’ти. йасма̄ бха̄вана̄нубха̄вена джха̄на̄дхигамо, бха̄вана̄ ча патхавӣкасин̣а̄дисан̃джа̄нанамукхена хотӣти сан̃н̃а̄сӣсена ниддисӣйати, тасма̄ а̄ха ‘‘сан̃н̃а̄балена уппанна’’нти. тена̄ха – ‘‘патхавӣкасин̣амеко сан̃джа̄на̄тӣ’’тиа̄ди. ‘‘на каллам̣ тассета’’нти идам̣ йасма̄ бхагавата̄ таттха таттха ‘‘атха ча пана̄хам̣ на вада̄мӣ’’ти вуттам̣, тасма̄ на ваттаббам̣ киретам̣ кевалина̄ уттамапурисена̄ти адхиппа̄йена̄ха, тена вуттам̣ ‘‘ман̃н̃ама̄на̄ вадантӣ’’ти. сесам̣ саббаттха сувин̃н̃еййамева.

джа̄лийасуттаван̣н̣ана̄йа лӣнаттхаппака̄сана̄.