3. пан̃хапуччхакаван̣н̣ана̄

нану ча чатта̄ропи адхипатайо екаккхан̣е лаббханти, ан̃н̃аман̃н̃асса пана адхипатайо на бхаванти ‘‘чатта̄ро иддхипа̄да̄ на магга̄дхипатино’’ти вуттатта̄. ра̄джапуттопама̄пи хи етаматтхам̣ дӣпетӣти? на, екаккхан̣е дутийасса адхипатино абха̄вато ева, ‘‘на магга̄дхипатино’’ти вуттатта̄ ра̄джапуттопама̄ адхипатим̣ на каронтӣти имамеваттхам̣ дӣпети, на адхипатӣнам̣ сахабха̄вам̣. там̣ катхам̣ джа̄нитаббанти? пат̣иккхиттатта̄. адхипатипаччайаниддесе хи ат̣т̣хакатха̄йам̣ (пат̣т̣ха̄. ат̣т̣ха. 1.3) вутта̄ ‘‘касма̄ пана йатха̄ хетупаччайаниддесе ‘хетӯ хетусампайуттака̄на’нти вуттам̣, евамидха ‘адхипатӣ адхипатисампайуттака̄на’нти аватва̄ ‘чханда̄дхипати чхандасампайуттака̄на’нтиа̄дина̄ найена десана̄ ката̄ти? екаккхан̣е абха̄вато’’ти. сати ча чатуннам̣ адхипатӣнам̣ сахабха̄ве ‘‘арийамаггасаман̇гисса вӣмам̣са̄дхипатеййам̣ маггам̣ бха̄вентасса̄’’ти висесанам̣ на каттаббам̣ сийа̄ авӣмам̣са̄дхипатикасса маггасса абха̄ва̄. чханда̄дӣнам̣ ан̃н̃аман̃н̃а̄дхипатикаран̣абха̄ве ча ‘‘вӣмам̣сам̣ т̣хапетва̄ там̣сампайутто’’тиа̄дина̄ чханда̄дӣнам̣ вӣмам̣са̄дхипатикаттавачанам̣ на ваттаббам̣ сийа̄. татха̄ ‘‘чатта̄ро арийамагга̄ сийа̄ магга̄дхипатино, сийа̄ на ваттабба̄ магга̄дхипатино’’ти (дха. са. 1429) евама̄дӣхипи адхипатӣнам̣ сахабха̄во пат̣иккхитто ева̄ти.

пан̃хапуччхакаван̣н̣ана̄ нит̣т̣хита̄.

иддхипа̄давибхан̇гаван̣н̣ана̄ нит̣т̣хита̄.