2. пан̃хапуччхакаван̣н̣ана̄

223. идха ана̄бхат̣т̣ханти еканта̄на̄рамман̣аттена бха̄ситам̣. ‘‘рӯпамиссакатта̄ ана̄рамман̣есу рӯпадхаммесу сан̇гахита’’нти касма̄ вуттам̣, нану миссакатта̄ ева джӣвитиндрийам̣ ана̄рамман̣есу асан̇гахитам̣. на хи ат̣т̣хиндрийа̄ ана̄рамман̣а̄ти вутта̄ти? саччаметам̣, джӣвитиндрийаекадесасса пана ана̄рамман̣есу рӯпадхаммесу сан̇гахитатам̣ сандха̄йетам̣ вуттам̣, арӯпакот̣т̣ха̄сена паритта̄рамман̣а̄дита̄ аттхӣти сийа̄паккхе сан̇гахитанти адхиппа̄йо. арӯпакот̣т̣ха̄сена пана паритта̄рамман̣а̄дита̄, рӯпакот̣т̣ха̄сена ча наваттаббата̄ аттхӣти миссакасса самуда̄йассева васена сийа̄паккхе сан̇гахитам̣, на екадесавасена̄ти дат̣т̣хаббам̣. на хи ана̄рамман̣ам̣ паритта̄рамман̣а̄дибха̄вена наваттаббам̣ на хотӣти. ‘‘рӯпан̃ча нибба̄нан̃ча ана̄рамман̣а̄, саттиндрийа̄ ана̄рамман̣а̄’’тиа̄дивачанан̃ча авиджджама̄на̄рамман̣а̄на̄рамман̣есу наваттаббесу ана̄рамман̣атта̄ наваттаббатам̣ дассети, на са̄рамман̣ассева наваттаббатам̣, наваттаббасса ва̄ са̄рамман̣атам̣. на хи наваттабба-саддо са̄рамман̣е нирул̣хо. йадипи сийа̄, ‘‘тиссо ча ведана̄ рӯпан̃ча нибба̄нан̃ча име дхамма̄ наваттабба̄ сукха̄йа ведана̄йа сампайутта̄’’тиа̄ди на вуччеййа, атха̄пи паритта̄рамман̣а̄дисамбандхо наваттабба-саддо са̄рамман̣есвева ваттати, ‘‘два̄йатана̄ сийа̄ паритта̄рамман̣а̄’’тиа̄дим̣ аватва̄ ‘‘мана̄йатанам̣ сийа̄ паритта̄рамман̣ам̣…пе… аппама̄н̣а̄рамман̣а’’нтипи, ‘‘дхамма̄йатанам̣ сийа̄ паритта̄рамман̣ам̣…пе… аппама̄н̣а̄рамман̣а’’нтипи, ‘‘сийа̄ ана̄рамман̣а’’нтипи ваттаббам̣ сийа̄. на хи пан̃хапуччхаке са̄васеса̄ десана̄ аттхӣти. ‘‘ат̣т̣хиндрийа̄ сийа̄ аджджхатта̄рамман̣а̄’’ти еттха ча джӣвитиндрийасса а̄кин̃чан̃н̃а̄йатанака̄ле арӯпасса рӯпасса ча ана̄рамман̣атта̄ наваттаббата̄ ведитабба̄.

пан̃хапуччхакаван̣н̣ана̄ нит̣т̣хита̄.

индрийавибхан̇гаван̣н̣ана̄ нит̣т̣хита̄.