2. уппатта̄нуппаттива̄раван̣н̣ана̄

991. ка̄мадха̄тусамбхӯта̄нан̃ча̄ти иддхийа̄ рӯпадха̄тугата̄нам̣ ка̄ма̄вачарасатта̄нан̃ча̄ти аттхо. гха̄на̄йатана̄дӣнам̣ абха̄вена̄ти еттха йади тадабха̄вена гандха̄йатана̄дӣни а̄йатана̄дикиччам̣ на каронти, асан̃н̃асаттесу чаккха̄йатанасса абха̄вена рӯпа̄йатанам̣ а̄йатана̄дикиччам̣ на кареййа. тато ‘‘асан̃н̃асатта̄нам̣ дева̄нам̣ упапаттиккхан̣е два̄йатана̄ни па̄тубхавантӣ’’тиа̄дивачанам̣ на ваттаббам̣ сийа̄. ка̄ма̄вачара̄диока̄са̄ таттха уппаджджама̄насатта̄нам̣, таттха парийа̄паннадхамма̄нам̣ ва̄ адхит̣т̣ха̄набха̄вена ‘‘дха̄тӯ’’ти вуччанти, татха̄ йесу ка̄ма̄вачара̄дисаттаника̄йесу ка̄ма̄вачара̄дисатта̄ уппаджджанти, тесам̣ сатта̄нам̣ уппатти еттха̄ти саттуппаттӣти вуччама̄на̄ те саттаника̄йа̄ ча, на панеттха апарийа̄паннока̄со апарийа̄паннасаттаника̄йо ча аттхи, йо ‘‘дха̄тӯ’’ти вуччеййа̄ти имаматтхам̣ дассенто ‘‘ока̄савасена ва̄ саттуппаттивасена ва̄ апарийа̄паннадха̄ту на̄ма наттхӣ’’ти а̄ха. саттуппаттивасена̄ти имина̄ ва̄ ока̄сасатталокадвайам̣ саха гахетва̄ та̄диса̄йа апарийа̄паннадха̄туйа̄ абха̄вам̣ дассети, саттабха̄вена ва̄ уппатти саттуппатти, сатта̄ва̄савасена там̣там̣бхававасена уппаджджама̄на̄ упа̄диннакаккхандха̄ там̣там̣парийа̄панна̄нам̣ садиса̄дхит̣т̣ха̄набха̄вена дха̄тӯти вуччантӣти евам̣ апарийа̄паннадха̄ту наттхӣти аттхо.