14. сиккха̄падавибхан̇го

1. абхидхаммабха̄джанӣйаван̣н̣ана̄

703. патит̣т̣ха̄нат̣т̣хена̄ти сампайогавасена упаниссайавасена ча ока̄сабха̄вена. пит̣т̣хапӯваоданакин̣н̣ана̄на̄самбха̄ре паккхипитва̄ маддитва̄ ката̄ сура̄ на̄ма. мадхука̄дипуппхапанаса̄дипхалауччхумуддика̄дина̄на̄самбха̄ра̄нам̣ раса̄ чирапарива̄сита̄ мерайам̣ на̄ма, а̄савоти аттхо.

704. там̣сампайуттатта̄ти виратисампайуттатта̄, виратичетана̄сампайуттатта̄ ва̄.

каммапатха̄ ева̄ти асаббаса̄дха̄ран̣есу джха̄на̄дикот̣т̣ха̄сесу каммапатхакот̣т̣ха̄сика̄ ева̄ти аттхо. сура̄па̄нампи ‘‘сура̄па̄нам̣, бхиккхаве, а̄севитам̣…пе… нирайасам̣ваттаника’’нти (а. ни. 8.40) висум̣ каммапатхабха̄вена а̄гатанти ваданти. евам̣ сати ека̄даса каммапатха̄ сийум̣, тасма̄сса йатха̄вуттесвева каммапатхесу упака̄ракаттасабха̄гаттавасена анупавесо дат̣т̣хаббо.

саттаиттхипуриса̄рамман̣ата̄ татха̄гахитасан̇кха̄ра̄рамман̣ата̄йа дат̣т̣хабба̄. ‘‘пан̃ча сиккха̄пада̄ паритта̄рамман̣а̄’’ти хи вуттам̣. ‘‘сабба̄пи хи ета̄ вӣтиккамитаббаваттхум̣ а̄рамман̣ам̣ катва̄ верачетана̄хи ева вирамантӣ’’ти (вибха. ат̣т̣ха. 704) ча ваккхатӣти.

горӯпасӣлако пакатибхаддо. ка̄кан̣икаматтасса аттха̄йа̄тиа̄ди лобхавасена муса̄катхане вуттам̣. досавасена муса̄катхане ча нит̣т̣хаппатто сан̇гхабхедо гахито. досавасена парасса бйасанаттха̄йа муса̄катхане пана тасса тасса гун̣авасена аппаса̄ваджджамаха̄са̄ваджджата̄ йоджетабба̄, манда̄дхиматтабйасаниччха̄васена ча. ниссаггийатха̄варавиджджа̄майиддхимайа̄ са̄хаттхика̄н̣аттикесвева пависантӣти две ева гахита̄.

пан̃чапи каммапатха̄ ева̄ти четана̄сан̇кха̄там̣ парийа̄йасӣлам̣ сандха̄йа вуттам̣, виратисӣлам̣ пана маггакот̣т̣ха̄сиканти. тесам̣ пана̄ти сесасӣла̄нам̣.

712. ‘‘кот̣т̣ха̄сабха̄вена̄’’ти вуттам̣, ‘‘патит̣т̣ха̄набха̄вена̄’’ти пана ваттаббам̣. еттха пана сиккха̄падава̄ре пахӣнапан̃ча̄бхаббат̣т̣ха̄насса арахато вирамитаббаверасса саббатха̄ абха̄ва̄ кирийесу виратийо на сантӣти на уддхат̣а̄, секкха̄нам̣ пана пахӣнапан̃чавераттепи там̣сабха̄гата̄йа верабхӯта̄нам̣ акусала̄нам̣ веранида̄на̄нам̣ лобха̄дӣнан̃ча саббха̄ва̄ виратӣнам̣ уппатти на на бхависсати. акусаласамут̣т̣хита̄ни ча ка̄йакамма̄дӣни тесам̣ ка̄йадуччарита̄дӣни вера̄нева, техи ча тесам̣ виратийо хонтева, йато напхалабхӯтассапи упаримаггаттайасса ат̣т̣хан̇гиката̄ хоти. сиккха̄ва̄ре ча абха̄ветаббата̄йа пхаладхамма̄пи на сиккхитабба̄, на̄пи сиккхитасиккхасса уппаджджама̄на̄ кирийадхамма̄ти на кечи абйа̄ката̄ сиккха̄ти уддхат̣а̄.

абхидхаммабха̄джанӣйаван̣н̣ана̄ нит̣т̣хита̄.

2. пан̃хапуччхакаван̣н̣ана̄

714. сампаттавиративасена̄ти сампатте паччуппанне а̄рамман̣е йатха̄вирамитаббато виративасена̄ти аттхо.

пан̃хапуччхакаван̣н̣ана̄ нит̣т̣хита̄.

сиккха̄падавибхан̇гаван̣н̣ана̄ нит̣т̣хита̄.