6. сахаджа̄тапаччайаниддесаван̣н̣ана̄

6. ‘‘ан̃н̃аман̃н̃асса̄ти ан̃н̃о ан̃н̃асса̄’’ти пора̄н̣апа̄т̣хо. па̄л̣ийам̣ пана ‘‘ан̃н̃аман̃н̃ам̣ сахаджа̄тапаччайена паччайо’’ти еттха вуттасса ‘‘ан̃н̃аман̃н̃а’’нти имасса аттхо ваттаббо, на авуттасса ‘‘ан̃н̃аман̃н̃асса̄’’ти имасса, на ча сама̄наттхассапи саддантарасса аттхе вутте саддантарасса аттхо вутто хоти, тасма̄ ‘‘ан̃н̃аман̃н̃анти ан̃н̃о ан̃н̃асса̄’’ти пат̣ханти. оккантӣти пан̃чавока̄рапат̣исандхийева вуччати, на итара̄ти имина̄ адхиппа̄йена̄ха ‘‘пан̃чавока̄рабхаве пат̣исандхиккхан̣е’’ти. рӯпино дхамма̄ арӯпӣнам̣ дхамма̄нанти идам̣ йадипи пуббе ‘‘оккантиккхан̣е на̄марӯпа’’нти вуттам̣, татха̄пи на тена кхан̣антаре паччайабха̄во рӯпӣнам̣ нива̄ритоти таннива̄ран̣аттхам̣ вуттам̣. кан̃чи ка̄лети кечи кисмин̃чи ка̄лети ва̄ аттхо. тена рӯпино дхамма̄ кечи ваттхубхӯта̄ кисмин̃чи пат̣исандхика̄лети рӯпантара̄нам̣ ваттхусса ча ка̄лантаре арӯпӣнам̣ сахаджа̄тапаччайам̣ пуббе анива̄ритам̣ нива̄рети. еван̃ча катва̄ ‘‘кан̃чи ка̄ла’’нти ва̄ ‘‘кисмин̃чи ка̄ле’’ти ва̄ ваттаббе вибхаттивипалла̄со като. тена хи ‘‘кан̃чӣ’’ти упайогекавачанам̣ ‘‘рӯпино дхамма̄’’ти етена саха самбандхена паччаттабахувачанасса а̄десо, ‘‘ка̄ле’’ти имина̄ самбандхена бхуммекавачанасса̄ти вин̃н̃а̄йати. пуримена ча ‘‘еко кхандхо ваттху ча тин̣н̣аннам̣ кхандха̄на’’нтиа̄дина̄ на̄масахитассева ваттхусса ‘‘на̄масса паччайо’’ти ваттаббатте а̄панне етена кевалассева татха̄ ваттаббатам̣ дассети.

тайо на ан̃н̃аман̃н̃авасена̄ти лаббхама̄непи каттхачи ан̃н̃аман̃н̃асахаджа̄тапаччайабха̄ве вачанена асан̇гахитатта̄ тасса евам̣ вуттанти дат̣т̣хаббам̣. чатусамут̣т̣ха̄никасса рӯпасса екадесабхӯте каммасамут̣т̣ха̄нарӯпе самуда̄йекадесавасена са̄мивачанам̣ дат̣т̣хаббам̣, ниддха̄ран̣е ва̄.

сахаджа̄тапаччайаниддесаван̣н̣ана̄ нит̣т̣хита̄.