13. пурисака̄ра̄нуйогаван̣н̣ана̄

123. каран̣аматтанти камма̄нам̣ ниппха̄дакаппайоджакабха̄вена паватта̄ кхандха̄.

124. пуримакаммена вина̄ пуггаласса джа̄ти, джа̄тасса ча виджджат̣т̣ха̄на̄дӣсу самма̄ миччха̄ ва̄ паватти наттхӣти сандха̄йа ‘‘пуримакаммамева тасса̄’’тиа̄дима̄ха.

125. каммават̣т̣асса̄ти еттха каммака̄ракасса йо ка̄рако, тенапи ан̃н̃ам̣ каммам̣ ка̄таббам̣, тасса ка̄ракенапи ан̃н̃анти евам̣ каммават̣т̣асса анупаччхедам̣ ваданти. пуггаласса ка̄рако каммасса ка̄рако а̄паджджатӣти вича̄ретаббаметам̣. ма̄та̄питӯхи джанитата̄дина̄ тасса ка̄ракам̣ иччхантасса каммака̄рака̄нам̣ ка̄ракапарампара̄ а̄паджджатӣти идан̃ча вича̄ретаббам̣.

170. суттавиродхабхайена̄ти ‘‘со кароти со пат̣исам̣ведайатӣти кхо, бра̄хман̣а, айамеко анто’’тиа̄дӣхи (сам̣. ни. 2.46) виродхабхайа̄.

171. ‘‘идха нандати печча нандатӣ’’ти (дха. па. 18) вачанато каммакаран̣ака̄ле випа̄капат̣исам̣веданака̄ле ча сойева̄ти пат̣иджа̄на̄тӣти адхиппа̄йо. сайам̣катам̣ сукхадуккханти ча пут̣т̣хо ‘‘ким̣ ну кхо, бхо готама, сайам̣катам̣ сукхам̣ дуккханти? ма̄ хевам̣ кассапа̄’’тиа̄дисуттавиродха̄ (сам̣. ни. 2.18) пат̣иккхипати.

176. ладдхиматтамеветанти сойевеко нева со хоти на ан̃н̃оти идам̣ пана наттхева, тасма̄ евам̣ва̄дино асайам̣ка̄рантиа̄ди а̄паджджатӣти адхиппа̄йо. апича̄тиа̄дина̄ идам̣ дассети – на парасса иччха̄васенева ‘‘со каротӣ’’тиа̄ди ануйого вутто, атха кхо ‘‘со каротӣ’’тиа̄дӣсу екам̣ аниччхантасса итарам̣, тан̃ча аниччхантасса ан̃н̃ам̣ а̄паннанти евам̣ ка̄ракаведакиччха̄йа т̣хатва̄ ‘‘со каротӣ’’тиа̄дӣсу там̣ там̣ аниччха̄йа а̄паннавасена̄пӣти. атха ва̄ на кевалам̣ ‘‘со каротӣ’’тиа̄дӣнам̣ саббесам̣ а̄паннатта̄, атха кхо екекассева ча а̄паннатта̄ айам̣ ануйого катоти дассети. пуриманайенева̄ти етена ‘‘идха нандатӣ’’тиа̄ди саббам̣ пат̣иджа̄нана̄дика̄ран̣ам̣ екато йоджетаббанти дассети.

пурисака̄ра̄нуйогаван̣н̣ана̄ нит̣т̣хита̄.

калйа̄н̣авагго нит̣т̣хито.