7. чатукканайасам̣санданаван̣н̣ана̄

46-52. екадхамматопи ан̃н̃аттам̣ аниччханто рӯпа̄диекекадхаммавасена на̄нуйун̃джитаббо. самуда̄йато хи айам̣ ан̃н̃аттам̣ аниччханто екадесато анан̃н̃аттам̣ пат̣иккхипанто на ниггаха̄рахо сийа̄ти етам̣ вачанока̄сам̣ ниваттетум̣ ‘‘айан̃ча ануйого’’тиа̄дима̄ха. сакаланти саттапан̃н̃а̄савидхо дхаммаппабхедо пуггалоти ва̄ параматтхасаччам̣ пуггалоти ва̄ евам̣ сакалам̣ сандха̄йа̄ти аттхо. евам̣ сакалам̣ параматтхам̣ чинтетва̄ тантивасена ануйогалаккхан̣асса т̣хапитатта̄ сакалапараматтхато ча ан̃н̃асса саччикат̣т̣хасса абха̄ва̄ саччикат̣т̣хена пуггалена тато ан̃н̃ена на бхавитаббанти ‘‘рӯпам̣ пуггало’’ти имам̣ пан̃хам̣ пат̣иккхипантасса ниггаха̄ропанам̣ йуттанти аттхо.

сабха̄гавиниббхогатоти рӯпато ан̃н̃асабха̄гатта̄ти вуттам̣ хоти. саббадхамма̄ти рӯпавадждже саббадхамме вадати. ‘‘рӯпасмим̣ пуггало’’ти еттха ниссайавина̄се вина̄са̄паттибхайена пат̣иккхипатӣти адхиппа̄йена̄ха ‘‘уччхедадит̣т̣хибхайена чева̄’’ти. тӣсу пана самайавиродхена пат̣иккхепо адхиппето. на хи со сакка̄йадит̣т̣хим̣ иччхати, апича сассатадит̣т̣хибхайена пат̣иккхипатӣти йуттам̣ ваттум̣. сакка̄йадит̣т̣хӣсу хи пан̃чева уччхедадит̣т̣хийо, сеса̄сассатадит̣т̣хийоти. ан̃н̃атра рӯпа̄ти еттха ча рӯпава̄ пуггалоти айаматтхо сан̇гахитоти ведитаббо.

чатукканайасам̣санданаван̣н̣ана̄ нит̣т̣хита̄.

нит̣т̣хита̄ ча сам̣санданакатха̄ван̣н̣ана̄.