7. саттаканиддесаван̣н̣ана̄

203. саддха̄ на̄ма са̄дхуладдхика̄ти уммуджджатӣти етена кусалесу дхаммесу антогадха̄, бодхипаккхийадхаммесу ва̄ адхимоккхабхӯта̄ саддха̄ са̄дхӯти уммуджджама̄нам̣ кусалам̣ дассети, евам̣ хирӣйа̄дӣсу ча. кусалесу дхаммесӯти еттха бхумманиддесо тадантогадхата̄йа тадупака̄рата̄йа ва̄ ведитаббо. еттха ча уммуджджати са̄ху саддха̄ кусалесу дхаммесӯтиа̄дина̄ саддха̄дӣнам̣ уммуджджанапан̃н̃а̄йа саддха̄дӣнам̣ уппаттим̣ дассети. тенева ‘‘тасса са̄ саддха̄ нева тит̣т̣хатӣ’’тиа̄ди вуттам̣. ‘‘са̄ху саддха̄ кусалесу дхаммесӯ’’ти ва̄ уммуджджанасса упака̄ракам̣ а̄нисам̣садассанам̣ ватва̄ ‘‘уммуджджатӣ’’ти етена саддха̄сан̇кха̄тамева уммуджджанам̣ дасситанти ведитаббам̣. чан̇кава̄рети раджака̄нам̣ кха̄рапариса̄ване. екакамманиббатта̄ пат̣исандхибхаван̇гачутисантати еко читтава̄роти чутито анантаро йатха̄гахито дутийо хотӣти а̄ха ‘‘дутийачиттава̄рена̄’’ти. уммуджджитва̄ т̣хита̄дайо чатта̄ро та̄йа та̄йа джа̄тийа̄ арахаттам̣ асаччхикаронта̄ анеке пуггала̄ ведитабба̄, саччхикаронто пана екопи пуббабха̄ге татийапуггала̄дибха̄вам̣ а̄паджджитва̄ анте саттамапуггало хотӣти.

саттаканиддесаван̣н̣ана̄ нит̣т̣хита̄.