1. кхандхападаван̣н̣ана̄

6. кхандха̄йатанадха̄туйомахантаре абхин̃н̃еййадхаммабха̄вена вутта̄, тесам̣ пана сабха̄вато абхин̃н̃а̄та̄нам̣ дхамма̄нам̣ парин̃н̃еййата̄дивисесадассанаттхам̣ сачча̄ни, адхипатийа̄дикиччависесадассанаттхам̣ индрийа̄дӣни ча вутта̄нӣти сачча̄дивисесо вийа сан̇гаха̄сан̇гахависесо ча абхин̃н̃еййаниссито вуччама̄но сувин̃н̃еййо хотӣти ‘‘тӣхи сан̇гахо. тӣхи асан̇гахо’’ти найамукхама̄тика̄ т̣хапита̄ти ведитабба̄. еван̃ча катва̄ ‘‘чатӯхӣ’’ти вутта̄ сампайогавиппайога̄ ча абхин̃н̃еййаниссайена кхандха̄дӣхева пуччхитва̄ виссаджджита̄ти. рӯпаккхандхо екена кхандхена̄ти йе дхамма̄ ‘‘рӯпаккхандхо’’ти вуччанти, тесам̣ пан̃часу кхандхесу рӯпаккхандхабха̄вена сабха̄гата̄ хотӣти рӯпаккхандхабха̄васан̇кха̄тена, рӯпаккхандхавачанасан̇кха̄тена ва̄ ган̣анена сан̇гахам̣ ган̣анам̣ дассети. тена̄ха ‘‘йан̃хи кин̃чӣ’’тиа̄ди. рӯпаккхандхоти хи сан̇гахитаббадхаммо дассито. йена сан̇гахена сан̇гайхати, тасса сан̇гахасса дассанам̣ ‘‘екена кхандхена̄’’ти вачанам̣. пан̃часу кхандхаган̣анесу екена кхандхаган̣анена ган̣итоти айан̃хеттха аттхо. йасма̄ ча кхандха̄дивачанехи сан̇гахо вуччати, тасма̄ упари ‘‘кхандхасан̇гахена сан̇гахита̄’’тиа̄дим̣ ваккхатӣти.

асан̇гаханайаниддесети идам̣ ‘‘сан̇гахо асан̇гахо’’ти етассева найасса екадесанайабха̄вена вуттам̣, на найантарата̄йа̄ти дат̣т̣хаббам̣. рӯпаккхандхамӯлака̄йева четтха дукатикачатукка̄ дассита̄ти етена ведана̄ккхандхамӯлака̄ пуримена йоджийама̄не висесо наттхӣти паччхимехева йоджетва̄ тайо дука̄ две тика̄ еко чатукко, сан̃н̃а̄ккхандхамӯлака̄ две дука̄ еко тико, сан̇кха̄раккхандхамӯлако еко дукоти ете лаббхантӣти дассети. тесам̣ пана бхедато пан̃чакапуччха̄виссаджджана̄нантарам̣ пуччха̄виссаджджанам̣ ка̄таббам̣ сам̣кхиттанти дат̣т̣хаббам̣, вуттанайена ва̄ сакка̄ н̃а̄тунти па̄л̣им̣ на а̄ропитанти.

а̄йатанапада̄диван̣н̣ана̄

40. йасма̄ ча дукатикесӯти йадипи екакепи садисам̣ виссаджджанам̣, екаке пана садисависсаджджана̄нам̣ чаккхундрийасотиндрийасукхиндрийа̄дӣнам̣ дука̄дӣсу асадисависсаджджанам̣ дит̣т̣хам̣. на хеттха чаккхусотачаккхусукхиндрийадука̄нам̣ ан̃н̃аман̃н̃асадисависсаджджанам̣, на̄пи дукехи тикасса, идха пана дуккхасамудайадуккхамаггадука̄нам̣ ан̃н̃аман̃н̃ам̣ тикена ча садисам̣ виссаджджананти дукатикесвева садисависсаджджанатам̣ самудайа̄нантарам̣ маггасаччасса вачане ка̄ран̣ам̣ вадати.