9. париса̄суттаван̣н̣ана̄

69. наваме (дӣ. ни. т̣ӣ. 2.172) сама̄гантаббато, сама̄гаччхатӣти ва̄ сама̄гамо, париса̄. бимбиса̄раппамукхо сама̄гамо бимбиса̄расама̄гамо. сесадвайепи есева найо. бимбиса̄ра…пе… сама̄гамасадисам̣ кхаттийапарисанти йоджана̄. ан̃н̃есу чаккава̄л̣есупи лаббхатева саттху кхаттийапариса̄диупасан̇каманам̣. а̄дито техи саддхим̣ саттху бха̄санам̣ а̄ла̄по, катханаппат̣икатханам̣ салла̄по. дхаммӯпасам̣хита̄ пуччха̄пат̣ипуччха̄ дхаммаса̄каччха̄. сан̣т̣ха̄нам̣ пат̣ичча катхитам̣ сан̣т̣ха̄напарийа̄йатта̄ ван̣н̣а-саддасса ‘‘махантам̣ хаттхира̄джаван̣н̣ам̣ абхинимминитва̄’’тиа̄дӣсу (сам̣. ни. 1.138) вийа. тесанти падам̣ убхайапада̄пеккхам̣ ‘‘тесампи лаккхан̣асан̣т̣ха̄нам̣ вийа саттху сарӣрасан̣т̣ха̄нам̣ тесам̣ кевалам̣ пан̃н̃а̄йати ева̄’’ти. на̄пи а̄муттаман̣икун̣д̣ало бхагава̄ хотӣти йоджана̄. чхиннассара̄ти двидха̄ бхиннассара̄. гаггарассара̄ти джаджджаритассара̄. бха̄сантаранти тесам̣ сатта̄нам̣ бха̄са̄то ан̃н̃ам̣ бха̄сам̣. вӣмам̣са̄ти чинтана̄. киматтхам̣…пе… десетӣти идам̣ нану атта̄нам̣ джа̄на̄петва̄ дхамме катхите тесам̣ са̄тисайо паса̄до хотӣти имина̄ адхиппа̄йена вуттам̣? йесам̣ атта̄нам̣ аджа̄на̄петва̄ва дхамме катхите паса̄до хоти, на джа̄на̄петва̄, та̄дисе сандха̄йа саттха̄ татха̄ кароти. таттха пайоджанама̄ха ‘‘ва̄санаттха̄йа̄’’ти. евам̣ сутопӣти евам̣ авин̃н̃а̄тадесако авин̃н̃а̄та̄гаманопи суто дхаммо аттано дхаммасудхаммата̄йева ана̄гате паччайо хоти сун̣антасса.

париса̄суттаван̣н̣ана̄ нит̣т̣хита̄.