5. упосатхавагго
1-8. сам̣кхиттӯпосатхасутта̄диван̣н̣ана̄
41-48. пан̃чамасса пат̣хама̄дӣсу наттхи ваттаббам̣. чхат̣т̣хе (сам̣. ни. т̣ӣ. 1.1.165) пан̃ча ан̇га̄ни етасса̄ти пан̃чан̇гам̣, пан̃чан̇гамева пан̃чан̇гикам̣, тасса пан̃чан̇гикасса. махатӣ даддарӣ вӣн̣а̄висесопи а̄татамева̄ти ‘‘чаммапарийонаддхесӯ’’ти висесанам̣ катам̣. екаталатӯрийам̣ кумбхатхунададдарика̄ди. убхайаталам̣ бхеримудин̇га̄ди. чаммапарийонаддхам̣ хутва̄ винибаддхам̣ а̄татавитатам̣. саббасо парийонаддхам̣ на̄ма чатурассаамбан̣ам̣ пан̣ава̄ди ча. гомукхӣа̄дӣнампи еттхева сан̇гахо дат̣т̣хаббо. вам̣са̄дӣти а̄ди-саддена сан̇кха̄дӣнам̣ сан̇гахо. самма̄дӣти саммата̄л̣акам̣сата̄л̣асила̄сала̄ката̄л̣а̄ди. таттха саммата̄л̣ам̣ на̄ма дантамайата̄л̣ам̣. кам̣сата̄л̣ам̣ лохамайам̣. сила̄майам̣ айопаттена ча ва̄даната̄л̣ам̣ сила̄сала̄ката̄л̣ам̣. сумуччхитасса̄ти сут̣т̣ху пат̣ийаттасса. пама̄н̣ети на̄тидал̣хана̄тиситхиласан̇кха̄те маджджхиме муччхана̄пама̄н̣е. чхекоти пат̣у пат̣т̣хо. со часса пат̣убха̄во манохароти а̄ха ‘‘сундаро’’ти. ран̃джетунти ра̄гам̣ уппа̄детум̣. кхаматева̄ти рочатева. на ниббиндатӣти на таджджети, сотасукхабха̄вато пийа̄йитаббова хоти.
бхатта̄рам̣ на̄тиман̃н̃атӣти са̄микам̣ мун̃читва̄ ан̃н̃ам̣ манаса̄пи на паттхети. ут̣т̣ха̄хика̄ти ут̣т̣ха̄навӣрийасампанна̄. аналаса̄ти никкосаджджа̄. сан̇гахитапариджджана̄ти самма̄нана̄дӣхи чева чхан̣а̄дӣсу песетабба-пийабхан̣д̣а̄дипан̣н̣а̄ка̄рапесана̄дӣхи ча сан̇гахитапариджана̄. идха париджано на̄ма са̄микасса чева аттано ча н̃а̄тиджано. самбхатанти касиван̣иджджа̄дӣни катва̄ а̄бхатадханам̣. саттамат̣т̣хама̄ни утта̄наттха̄ни.
сам̣кхиттӯпосатхасутта̄диван̣н̣ана̄ нит̣т̣хита̄.
9-10. пат̣хамаидхалокикасутта̄диван̣н̣ана̄
49-50. наваме идхалокавиджайа̄йа̄ти идхалокавиджинанаттха̄йа абхибхаваттха̄йа. йо хи дит̣т̣хадхаммикам̣ анаттхам̣ париваджджанавасена абхибхавати, тато ева тадаттхам̣ сампа̄дети, со идхалокавиджайа̄йа пат̣ипанно на̄ма хоти паччаттхиканигган̣ханато садаттхасампа̄данато ча. тена̄ха ‘‘айам̣са локо а̄раддхо хотӣ’’ти. (пасам̣са̄вахато тайидам̣ пасам̣са̄ваханам̣ киттисаддена идхалоке садда̄нам̣ читтатосанавиддхеййабха̄ва̄па̄данена ча хотӣти дат̣т̣хаббам̣.) сусам̣вихитакаммантоти йа̄губхаттапачанака̄ла̄дӣни анатиккамитва̄ тасса тасса са̄дхукам̣ каран̣ена сут̣т̣ху сам̣вихитакамманто. паралокавиджайа̄йа̄ти паралокасса виджинанаттха̄йа абхибхаваттха̄йа. йо хи сампара̄йикам̣ анаттхам̣ париваджджанавасена абхибхавати, тато ева тадаттхам̣ сампа̄дети, со паралокавиджайа̄йа пат̣ипанно на̄ма хоти. сесам̣ саббаттха утта̄намева.
пат̣хамаидхалокикасутта̄диван̣н̣ана̄ нит̣т̣хита̄.
упосатхаваггаван̣н̣ана̄ нит̣т̣хита̄.
пат̣хамапан̣н̣а̄сакам̣ нит̣т̣хитам̣.