10. аракасуттаван̣н̣ана̄

74. дасаме париттанти иттарам̣. тена̄ха ‘‘аппам̣ тхока’’нти. пабандха̄нупаччхедасса паччайабха̄во идха джӣвитасса расо киччанти адхиппетанти а̄ха ‘‘сарасапариттата̄йапӣ’’ти. тададхӣнавуттита̄йапи хи ‘‘йо, бхиккхаве, чирам̣ джӣвати, со вассасатам̣ аппам̣ ва̄ бхиййо’’ти вачанато париттам̣ кхан̣апариттата̄йапи. параматтхато хи атипаритто сатта̄нам̣ джӣвитаккхан̣о екачиттаккхан̣аппаваттиматтойева. йатха̄ на̄ма ратхачаккам̣ паваттама̄нампи екенева немиппадесена паваттати, тит̣т̣хама̄нампи екенева тит̣т̣хати, евамевам̣ екачиттаккхан̣икам̣ сатта̄нам̣ джӣвитам̣ тасмим̣ читте нируддхаматте сатто нируддхоти вуччати. йатха̄ха ‘‘атӣте читтаккхан̣е джӣвиттха на джӣвати на джӣвиссати. ана̄гате читтаккхан̣е на джӣвиттха на джӣвати джӣвиссати. паччуппанне читтаккхан̣е на джӣвиттха джӣвати на джӣвиссати.

‘‘джӣвитам̣ аттабха̄во ча, сукхадуккха̄ ча кевала̄;

екачиттасама̄йутта̄, лахусо ваттате кхан̣о.

‘‘йе нируддха̄ марантасса, тит̣т̣хама̄насса ва̄ идха;

саббепи садиса̄ кхандха̄, гата̄ аппат̣исандхика̄.

‘‘аниббаттена на джа̄то, паччуппаннена джӣвати;

читтабхан̇га̄ мато локо, пан̃н̃атти параматтхийа̄’’ти. (маха̄ни. 10);

лахусанти лахукам̣. тена̄ха ‘‘лахум̣ уппаджджитва̄ нируджджханато лахуса’’нти. париттам̣ лахусанти убхайам̣ панетам̣ аппакасса вевачанам̣. йан̃хи аппакам̣, там̣ париттан̃чева лахукан̃ча хоти. идха пана а̄йуно адхиппетатта̄ рассанти вуттам̣ хоти. манта̄йанти каран̣аттхе етам̣ бхуммавачананти а̄ха ‘‘манта̄йа боддхаббам̣, пан̃н̃а̄йа джа̄нитаббанти аттхо’’ти. манта̄йанти ва̄ мантеййанти вуттам̣ хоти, мантетаббам̣ манта̄йа упапариккхитаббанти аттхо. пан̃н̃а̄йа джа̄нитаббанти джа̄нитаббам̣ джӣвитасса париттабха̄во бахудуккха̄дибха̄во. джа̄нитва̄ ча пана саббапалибодхе чхиндитва̄ каттаббам̣ кусалам̣, чаритаббам̣ брахмачарийам̣. йасма̄ иттхи джа̄тасса амаран̣ам̣, аппам̣ ва̄ бхиййо вассасатато упари аппам̣ ан̃н̃ам̣ вассасатам̣ аппатва̄ вӣсам̣ ва̄ тим̣сам̣ ва̄ чатта̄лӣсам̣ ва̄ пан̣н̣а̄сам̣ ва̄ сат̣т̣хи ва̄ васса̄ни джӣвати, евам̣дӣгха̄йуко пана атидуллабхо. ‘‘асуко хи евам̣ чирам̣ джӣватӣ’’ти таттха таттха гантва̄ дат̣т̣хаббо хоти. таттха виса̄кха̄ упа̄сика̄ вӣсасатам̣ джӣвати, татха̄ поккхараса̄тибра̄хман̣о, брахма̄йубра̄хман̣о, ба̄варийабра̄хман̣о, а̄нандаттхеро, маха̄кассапаттхероти. ануруддхаттхеро пана вассасатан̃чева пан̣н̣а̄сан̃ча васса̄ни. ба̄кулаттхеро вассасатан̃чева сат̣т̣хи ча васса̄ни, айам̣ саббадӣгха̄йуко, сопи две вассасата̄ни на джӣви.

аракасуттаван̣н̣ана̄ нит̣т̣хита̄.

маха̄ваггаван̣н̣ана̄ нит̣т̣хита̄.