1-2. абйа̄катасутта̄диван̣н̣ана̄

54-55. чхат̣т̣хаваггасса пат̣хамам̣ сувин̃н̃еййамева. дутийе атӣте аттабха̄ве ниббаттакам̣ камманти ‘‘пуримакаммабхавасмим̣ мохо авиджджа̄, а̄йӯхана̄ сан̇кха̄ра̄, никанти тан̣ха̄, упагаманам̣ упа̄да̄нам̣, четана̄ бхаво’’ти евама̄гатам̣ сапариккха̄рам̣ пан̃чавидхам̣ каммават̣т̣ама̄ха. етарахи ме аттабха̄во на сийа̄ти вин̃н̃а̄н̣ана̄марӯпасал̣а̄йатанапхассаведана̄сахитам̣ паччуппаннам̣ пан̃чавидхам̣ випа̄кават̣т̣ама̄ха. йам̣ аттхиканти йам̣ параматтхато виджджама̄накам̣. тена̄ха ‘‘бхӯта’’нти. тан̃хи паччайаниббаттата̄йа ‘‘бхӯта’’нти вуччати. там̣ паджаха̄мӣти таппат̣ибаддхаччхандара̄гаппаха̄нена тато ева а̄йатим̣ ануппаттидхаммата̄па̄данавасена паджаха̄ми париччаджа̄ми. харитантанти (ма. ни. ат̣т̣ха. 1.303) харитамева. анта-саддена падавад̣д̣ханам̣ катам̣ йатха̄ ‘‘ванантам̣ суттанта’’нти, аллатин̣а̄дӣни а̄гамма нибба̄йатӣти аттхо. патхантанти маха̄маггам̣. селантанти паббатам̣. удакантанти удакам̣. раман̣ӣйам̣ ва̄ бхӯмибха̄ганти тин̣агумба̄дирахитам̣ вивиттам̣ аббхока̄сабхӯмибха̄гам̣. ана̄ха̄ра̄ти апаччайа̄ нирупа̄да̄на̄. сесаметтха утта̄намева.

абйа̄катасутта̄диван̣н̣ана̄ нит̣т̣хита̄.