2. балавагго

1. анануссутасуттаван̣н̣ана̄

11. дутийасса пат̣хаме абхиджа̄нитва̄ти абхивисит̣т̣хена н̃а̄н̣ена джа̄нитва̄. ат̣т̣хахи ка̄ран̣ехи татха̄гатасса̄ти ‘‘татха̄ а̄гатоти татха̄гато. татха̄ гатоти татха̄гато. татхалаккхан̣ам̣ а̄гатоти татха̄гато. татхадхамме йа̄тха̄вато абхисамбуддхоти татха̄гато. татхадассита̄йа татха̄гато. татха̄ва̄дита̄йа татха̄гато. татха̄ка̄рита̄йа татха̄гато. абхибхаванат̣т̣хена татха̄гато’’ти евам̣ вуттехи ат̣т̣хахи ка̄ран̣ехи. усабхасса иданти а̄сабхам̣, сет̣т̣хат̣т̣ха̄нам̣. тена̄ха ‘‘а̄сабхам̣ т̣ха̄нанти сет̣т̣хат̣т̣ха̄на’’нти. парато дасситабалайогена ‘‘дасабалоха’’нти абхӣтана̄дам̣ надати. брахмачакканти еттха сет̣т̣хапарийа̄йо. брахмасаддоти а̄ха ‘‘сет̣т̣хачакка’’нти. чаккан̃четам̣ дхаммачаккам̣ адхиппетам̣.

анануссутасуттаван̣н̣ана̄ нит̣т̣хита̄.

3. сам̣кхиттасуттаван̣н̣ана̄

13. татийе ка̄мам̣ сампайуттадхаммесу тхирабха̄вопи балат̣т̣хо ева, пат̣ипаккхехи пана акампанӣйаттам̣ са̄тисайам̣ балат̣т̣хоти вуттам̣ ‘‘мут̣т̣хассачче на кампатӣ’’ти.

сам̣кхиттасуттаван̣н̣ана̄ нит̣т̣хита̄.

4. виттхатасуттаван̣н̣ана̄

14. чатуттхе сатинепаккена̄ти сатийа̄ непаккена, тиккхависадасӯрабха̄вена̄ти аттхо. ат̣т̣хакатха̄йам̣ пана непаккам̣ на̄ма пан̃н̃а̄ти адхиппа̄йена ‘‘непаккам̣ вуччати пан̃н̃а̄’’ти вуттам̣. евам̣ сати ан̃н̃о ниддит̣т̣хо на̄ма хоти. сатима̄ти ча имина̄ сависеса̄ сати гахита̄ти паратопи ‘‘чиракатампи чирабха̄ситампи сарита̄ ануссарита̄’’ти сатикиччамева ниддит̣т̣хам̣, на пан̃н̃а̄киччам̣, тасма̄ сатинепаккена̄ти сатийа̄ непаккабха̄вена̄ти сакка̄ вин̃н̃а̄тум̣ лаббхатева. паччайависесавасена ан̃н̃адхамманирапеккхо сатийа̄ балавабха̄во. татха̄ хи н̃а̄н̣авиппайуттачиттенапи саджджха̄йанасаммасана̄ни самбхаванти.

чиракатампӣти аттана̄ ва̄ парена ва̄ ка̄йена чиракатам̣ четийан̇ган̣аватта̄димаха̄ваттаппат̣ипаттипӯран̣ам̣. чирабха̄ситампӣти аттана̄ ва̄ парена ва̄ ва̄ча̄йа чирабха̄ситам̣ саккаччам̣ уддисанауддиса̄панадхамма̄са̄ран̣адхаммадесана̄упанисиннакапарикатха̄анумоданӣйа̄дивасена паваттитам̣ вачӣкаммам̣. сарита̄ ануссарита̄ти тасмим̣ ка̄йена чиракате ка̄йо на̄ма ка̄йавин̃н̃атти, чирабха̄сите ва̄ча̄ на̄ма вачӣвин̃н̃атти, тадубхайампи рӯпам̣, там̣самут̣т̣ха̄пака̄ читтачетасика̄ арӯпам̣. ити име рӯпа̄рӯпадхамма̄ евам̣ уппаджджитва̄ евам̣ нируддха̄ти сарати чева ануссарати ча, сатисамбоджджхан̇гам̣ самут̣т̣ха̄петӣти аттхо. боджджхан̇гасамут̣т̣ха̄пика̄ хи сати идха адхиппета̄. та̄йа сатийа̄ еса саким̣ саран̣ена сарита̄, пунаппунам̣ саран̣ена ануссарита̄ти ведитабба̄.

виттхатасуттаван̣н̣ана̄ нит̣т̣хита̄.

5-10. дат̣т̣хаббасутта̄диван̣н̣ана̄

15-20. пан̃чаме сависайасмим̣йева̄ти аттано аттано висайе ева. локийалокуттарадхамме катхетунти локийадхамме локуттарадхамме ча тена тена паваттивисесена катхетум̣. чатӯсу сота̄паттийан̇гесӯти саппурисасам̣сево саддхаммассаванам̣ йонисоманасика̄ро дхамма̄нудхаммаппат̣ипаттӣти имесу чатӯсу сота̄паттимаггака̄ран̣есу. ка̄ман̃ча тесу сатиа̄дайопи дхамма̄ иччхитабба̄ва техи вина̄ тесам̣ асамбхавато, татха̄пи четтха саддха̄ висесато киччака̄рӣти ведитабба̄. саддхо ева хи саппурисе пайирупа̄сати, саддхаммам̣ сун̣а̄ти, йонисо ча аничча̄дито манаси кароти, арийамаггасса ча анудхаммам̣ пат̣ипаджджати, тасма̄ вуттам̣ ‘‘еттха саддха̄балам̣ дат̣т̣хабба’’нти. имина̄ найена сесабалесупи аттхо дат̣т̣хаббо.

чатӯсу саммаппадха̄несӯти чатуббидхасаммаппадха̄набха̄вана̄йа. чатӯсу сатипат̣т̣ха̄несӯтиа̄дӣсупи есева найо. еттха ча сота̄паттиан̇гесу саддха̄ вийа, саммаппадха̄набха̄вана̄йа вӣрийам̣ вийа ча сатипат̣т̣ха̄набха̄вана̄йа йасма̄ ‘‘винеййа локе абхиджджха̄доманасса’’нти (дӣ. ни. 2.373; ма. ни. 1.106) вачанато пуббабха̄ге киччато сати адхика̄ иччхитабба̄, евам̣ сама̄дхикаммикасса сама̄дхи, ‘‘арийасаччабха̄вана̄ пан̃н̃а̄бха̄вана̄’’ти катва̄ таттха пан̃н̃а̄ пуббабха̄ге адхика̄ иччхитабба̄ти па̄кат̣ойаматтхо. адхигамаккхан̣е пана сама̄дхипан̃н̃а̄нам̣ вийа саббесампи бала̄нам̣ саддха̄дӣнам̣ самата̄ва иччхитабба̄. татха̄ хи ‘‘еттха саддха̄бала’’нтиа̄дина̄ таттха таттха еттхаггахан̣ам̣ катам̣.

ида̄ни саддха̄дӣнам̣ таттха таттха атирекакиччатам̣ упама̄йа вибха̄ветум̣ ‘‘йатха̄ хӣ’’тиа̄ди вуттам̣. татридам̣ упама̄ сам̣санданам̣ – ра̄джапан̃чамасаха̄йа̄ вийа вимуттипарипа̄чака̄ни пан̃ча бала̄ни. несам̣ кӣл̣анаттхам̣ екаджджхам̣ вӣтхиотаран̣ам̣ вийа бала̄нам̣ екаджджхам̣ випассана̄вӣтхиотаран̣ам̣, саха̄йесу пат̣хама̄дӣнам̣ йатха̄сакам̣ гехева вича̄ран̣а̄ вийа саддха̄дӣнам̣ сота̄паттиан̇га̄дӣни патва̄ пуббан̇гамата̄. саха̄йесу итаресам̣ таттха таттха тун̣хӣбха̄во вийа сесабала̄нам̣ таттха таттха таданвайата̄, тасса пуббан̇гамасса баласса кичча̄нугата̄. на хи тада̄ тесам̣ сасамбха̄рапатхавӣа̄дӣсу а̄па̄дӣнам̣ вийа киччам̣ па̄кат̣ам̣ хоти, саддха̄дӣнам̣йева пана киччам̣ вибхӯтам̣ хутва̄ тит̣т̣хати пуретарам̣ татха̄паччайехи читтасанта̄насса абхисан̇кхататта̄. еттха ча випассана̄каммикасса бха̄вана̄ висесато пан̃н̃уттара̄ти дассанаттхам̣ ра̄джа̄нам̣ нидассанам̣ катва̄ пан̃н̃индрийам̣ вуттам̣. чхат̣т̣ха̄дӣни сувин̃н̃еййа̄ни.

дат̣т̣хаббасутта̄диван̣н̣ана̄ нит̣т̣хита̄.

балаваггаван̣н̣ана̄ нит̣т̣хита̄.