4-6. тикан̣д̣акӣсутта̄диван̣н̣ана̄

144-6. чатуттхе пат̣икӯлети аманун̃н̃е анит̣т̣хе. аппат̣икӯласан̃н̃ӣти ит̣т̣ха̄ка̄ренева паваттачитто. ит̣т̣хасмим̣ ваттхусмим̣ асубха̄йа ва̄ пхарати, аниччато ва̄ упасам̣харати упанети паваттети. анит̣т̣хасмим̣ ваттхусминти анит̣т̣хе саттасан̃н̃ите а̄рамман̣е. метта̄йа ва̄ пхаратӣти меттам̣ хитеситам̣ упасам̣харанто саббаттхакамева ва̄ таттха пхарати. дха̄туто ва̄ упасам̣харатӣти дхаммасабха̄вачинтанена дха̄туто паччавеккхан̣а̄йа дха̄туманасика̄рам̣ ва̄ таттха паваттети. тадубхайам̣ абхиниваджджетва̄ти сабха̄вато а̄нубха̄вато ча упатит̣т̣хантам̣ а̄рамман̣е пат̣икӯлабха̄вам̣ аппат̣икӯлабха̄ван̃ча̄ти там̣ убхайам̣ паха̄йа аггахетва̄, саббасмим̣ пана тасмим̣ маджджхатто хутва̄ти вуттам̣ хоти. маджджхатто хутва̄ вихаритука̄мо пана ким̣ каротӣти? ит̣т̣ха̄нит̣т̣хесу а̄па̄тхам̣ гатесу нева соманассито хоти, на доманассито хоти. упеккхако вихареййа̄ти ит̣т̣хе араджджанто анит̣т̣хе адуссанто йатха̄ ан̃н̃е асамапеккханена мохам̣ уппа̄денти, евам̣ ануппа̄денто чхасу а̄рамман̣есу чхал̣ан̇гупеккха̄йа упеккхако вихареййа. тенева̄ха ‘‘чхал̣ан̇гупеккха̄васена пан̃чамо’’ти. ит̣т̣ха̄нит̣т̣хачхал̣а̄рамман̣а̄па̄тхе парисуддхапакатибха̄ва̄виджаханалаккхан̣а̄йа чхасу два̄ресу паваттанато ‘‘чхал̣ан̇гупеккха̄’’ти ладдхана̄ма̄йа татрамаджджхаттупеккха̄йа васена пан̃чамо ва̄ро вуттоти аттхо. пан̃чамам̣ чхат̣т̣хан̃ча утта̄намева.

тикан̣д̣акӣсутта̄диван̣н̣ана̄ нит̣т̣хита̄.