2. дутийачакка̄нуваттанасуттаван̣н̣ана̄

132. дутийе чаккаваттиваттанти дасавидхам̣, два̄дасавидхам̣ ва̄ чаккаваттибха̄ва̄вахам̣ ваттам̣. таттха антоджанасмим̣ балака̄йе дхаммика̄йева раккха̄варан̣агуттийа̄ сам̣видха̄нам̣, кхаттийесу, ануйантесу, бра̄хман̣агахапатикесу, негамаджа̄нападесу, саман̣абра̄хман̣есу, мигапаккхӣсу, адхаммикапат̣иккхепо, адхана̄нам̣ дхана̄нуппада̄нам̣, саман̣абра̄хман̣е упасан̇камитва̄ пан̃хапуччхананти идам̣ дасавидхам̣ чаккаваттиваттам̣. идамева ча гахапатике паккхиджа̄те ча висум̣ катва̄ гахан̣авасена два̄дасавидхам̣. питара̄ паваттитамева ануппаваттетӣти дасавидхам̣ ва̄ два̄дасавидхам̣ ва̄ чаккаваттиваттам̣ пӯретва̄ нисиннасса путтасса ан̃н̃ам̣ па̄тубхавати, со там̣ паваттети. ратанамайатта̄ пана садисат̣т̣хена тадеветанти катва̄ ‘‘питара̄ паваттита’’нти вуттам̣. йасма̄ ва̄ со ‘‘аппоссукко, твам̣ дева, хохи, ахамануса̄сисса̄мӣ’’ти а̄ха. тасма̄ питара̄ паваттитам̣ а̄н̣а̄чаккам̣ ануппаваттети на̄ма̄ти еваметтха аттхо дат̣т̣хаббо. йан̃хи аттано пун̃н̃а̄нубха̄васиддхам̣ чаккаратанам̣, там̣ ниппарийа̄йато тена паваттитам̣ на̄ма, нетаранти пат̣хаманайо вутто. йасма̄ паваттитассева ануваттанам̣, пат̣хаманайо ча там̣садисе таббоха̄равасена вуттоти там̣ ана̄дийитва̄ дутийанайо вутто.

дутийачакка̄нуваттанасуттаван̣н̣ана̄ нит̣т̣хита̄.