9. пат̣хамасекхасуттаван̣н̣ана̄

89. наваме а̄рамитаббат̣т̣хена каммам̣ а̄ра̄мо етасса̄ти камма̄ра̄мо, тасса бха̄во камма̄ра̄мата̄. таттха камманти итикаттаббам̣ каммам̣ вуччати. сеййатхидам̣ – чӣваравича̄ран̣ам̣ чӣваракаммакаран̣ам̣ упаттхамбханам̣ паттаттхавикаам̣сабаддхакака̄йабандханадхаммакаран̣аа̄дха̄ракапа̄дакатхаликасаммаджджаниа̄дӣнам̣ каран̣анти. екаччо хи ета̄ни каронто сакаладивасам̣ ета̄нева кароти, там̣ сандха̄йеса пат̣иккхепо. йо пана етесам̣ каран̣авела̄йамева та̄ни кароти, уддесавела̄йа уддесам̣ ган̣ха̄ти, саджджха̄йавела̄йа саджджха̄йати, четийан̇ган̣аваттавела̄йа четийан̇ган̣аваттам̣ кароти, манасика̄равела̄йа манасика̄рам̣ кароти, на со камма̄ра̄мо на̄ма. бхасса̄ра̄мата̄ти еттха йо иттхиван̣н̣апурисаван̣н̣а̄дивасена а̄ла̄пасалла̄пам̣ каронтойева дивасан̃ча раттин̃ча вӣтина̄мети, еварӯпо бхассе парийантака̄рӣ на хоти, айам̣ бхасса̄ра̄мо на̄ма. йо пана раттимпи дивасампи дхаммам̣ катхети, пан̃хам̣ виссаджджети, айам̣ аппабхассо бхассе парийантака̄рӣйева. касма̄? ‘‘саннипатита̄нам̣ во, бхиккхаве, двайам̣ каран̣ӣйам̣ дхаммӣ ва̄ катха̄, арийо ва̄ тун̣хӣбха̄во’’ти (ма. ни. 1.273; уда̄. 12, 28, 29) вуттатта̄.

нидда̄ра̄мата̄ти еттха йо гаччхантопи нисиннопи нипаннопи тхинамиддха̄бхибхӯто нидда̄йатийева, айам̣ нидда̄ра̄мо на̄ма. йасса пана караджака̄йе гелан̃н̃ена читтам̣ бхаван̇ге отарати, на̄йам̣ нидда̄ра̄мо. тенева̄ха – ‘‘абхиджа̄на̄ми кхо пана̄хам̣, аггивессана, гимха̄нам̣ паччхиме ма̄се паччха̄бхаттам̣ пин̣д̣апа̄таппат̣икканто чатуггун̣ам̣ сан̇гха̄т̣им̣ пан̃н̃а̄петва̄ даккхин̣ена пассена сато сампаджа̄но ниддам̣ оккамита̄’’ти (ма. ни. 1.387). сан̇ган̣ика̄ра̄мата̄ти еттха йо екасса дутийо, двиннам̣ татийо, тин̣н̣ам̣ чатуттхоти евам̣ сам̣сат̣т̣хова вихарати, екако асса̄дам̣ на лабхати, айам̣ сан̇ган̣ика̄ра̄мо. йо пана чатӯсу ирийа̄патхесу екакова асса̄дам̣ лабхати, на̄йам̣ сан̇ган̣ика̄ра̄мо ведитаббо. секха̄нам̣ пат̣иладдхагун̣асса париха̄на̄самбхавато ‘‘упаригун̣ехӣ’’тиа̄ди вуттам̣.

пат̣хамасекхасуттаван̣н̣ана̄ нит̣т̣хита̄.