5-6. рохитассасутта̄диван̣н̣ана̄

45-46. пан̃чаме (сам̣. ни. т̣ӣ. 1.1.107) екока̄сети чаккава̄л̣асса парийантасан̃н̃ите екасмим̣ ока̄се. бхумманти ‘‘йаттха̄’’ти идам̣ бхуммавачанам̣. са̄ман̃н̃ато вуттампи ‘‘со локасса анто’’ти вачанато висит̣т̣хависайамева хоти. ‘‘на джа̄йати, на мӣйатӣ’’ти ватва̄ пуна ‘‘на чавати, на упападжджатӣ’’ти касма̄ вуттанти а̄ха ‘‘идам̣ апара̄парам̣…пе… гахита’’нти. падагаманена̄ти падаса̄ гаманена. саттха̄ сан̇кха̄ралокасса антам̣ сандха̄йа вадати упари сабба̄ни пака̄сетука̄мо. сан̇кха̄ралокасса хи анто нибба̄нам̣.

дал̣хам̣ тхирам̣ дхану етасса̄ти дал̣хадханва̄, со ева ‘‘дал̣хадхамма̄’’ти вутто. тена̄ха ‘‘дал̣хадханӯ’’ти. уттамаппама̄н̣ам̣ на̄ма сахассатха̄мадхану. дханугган̣ханасиппачиттаката̄йа дхануггахо, на дхануггахан̣аматтена̄ти а̄ха ‘‘дхануггахоти дхануа̄чарийо’’ти. ‘‘дхануггахо’’ти ватва̄ ‘‘сиккхито’’ти вутте дханусиккха̄йа сиккхитоти вин̃н̃а̄йати. сиккха̄ ча еттакена ка̄лена сиккхантасса уккам̣сагата̄ хотӣти а̄ха ‘‘два̄даса васса̄ни дханусиппам̣ сиккхито’’ти. усабхаппама̄н̣ети вӣсати йат̣т̣хийо усабхам̣, тасмим̣ усабхаппама̄н̣е падесе. ва̄лагганти ва̄лакот̣им̣. катахаттхоти паричитахаттхо. катасараккхепоти тхиралаккхе ча чалалаккхе ча паресам̣ дассанавасена сараккхепасса ката̄пӣ. тена̄ха ‘‘дасситасиппо’’ти, ‘‘катайогго’’ти кечи. асанти етена̄ти асанам̣, кан̣д̣о. та̄лаччха̄динти та̄лаччха̄йам̣. са̄ пана ратанаматта̄ видаттхичатуран̇гула̄.

пураттхима̄ самудда̄ти екасмим̣ чаккава̄л̣е пураттхима̄ самудда̄. самуддасӣсена пураттхимачаккава̄л̣амукхават̣т̣им̣ вадати. паччхимасамуддоти еттха̄пи есева найо. ниппапан̃чатанти адантака̄ритам̣. сампаттети та̄дисена джавена гаччхантена сампатте. анотаттети еттха̄пи ‘‘сампатте’’ти падам̣ а̄нетва̄ самбандхо, татха̄ ‘‘на̄галата̄дантакат̣т̣ха’’нти еттха̄пи. тада̄ти йада̄ со локантагавесако ахоси, тада̄. дӣгха̄йукака̄лоти анекавассасахасса̄йукака̄ло. чаккава̄л̣алокасса̄ти са̄ман̃н̃авасена екавачанам̣, чаккава̄л̣алока̄нанти аттхо. имасмим̣йева чаккава̄л̣е ниббаттипуббапаричайасиддха̄йа никантийа̄.

сасан̃н̃имхи саманакети на рӯпадхаммаматтаке, атха кхо пан̃чаккхандхасамуда̄йети дассети. самитапа̄поти самуччхиннасам̣килесадхаммо. чхат̣т̣хам̣ утта̄намева.

рохитассасутта̄диван̣н̣ана̄ нит̣т̣хита̄.