1. сам̣кхиттасуттаван̣н̣ана̄

232. чатуттхасса пат̣хаме ка̄л̣аканти малӣнам̣, читтасса аппабхассарабха̄вакаранти аттхо. там̣ панеттха каммапатхаппаттамева адхиппетанти а̄ха ‘‘дасаакусалакаммапатха’’нти. кан̣ха̄бхиджа̄тихетуто ва̄ кан̣хам̣. тена̄ха ‘‘кан̣хавипа̄ка’’нти. апа̄йӯпапатти мануссесу ча добхаггийам̣ кан̣хавипа̄ко, йам̣ тасса тамабха̄во вутто. ниббаттанатоти ниббатта̄панато. пан̣д̣араканти ода̄там̣, читтасса пабхассарабха̄вакаранти аттхо. сукка̄бхиджа̄тихетуто ва̄ суккам̣. тена̄ха ‘‘суккавипа̄ка’’нти. саггӯпапатти мануссасобхаггийан̃ча суккавипа̄ко, йам̣ тасса джотибха̄во вутто. уккат̣т̣ханиддесена пана ‘‘сагге ниббаттанато’’ти вуттам̣, ниббатта̄панатоти аттхо. миссакакамманти ка̄лена кан̣хам̣ ка̄лена сукканти евам̣ миссакавасена катакаммам̣. сукхадуккхавипа̄канти ватва̄ таттха сукхадуккха̄нам̣ паваттиа̄ка̄рам̣ дассетум̣ ‘‘миссакакаммам̣ хӣ’’тиа̄ди вуттам̣. каммасса кан̣хасуккасаман̃н̃а̄ кан̣хасукка̄бхиджа̄тихетута̄йа̄ти апачайага̄мита̄йа тадубхайавиддхам̣сакасса каммаккхайакаракаммасса идха суккапарийа̄йопи иччхитоти а̄ха ‘‘убхайа…пе… айаметтха аттхо’’ти. таттха убхайавипа̄касса̄ти йатха̄дхигатасса убхайавипа̄касса. сампаттибхавапарийа̄панно хи випа̄ко идха суккам̣ суккавипа̄коти адхиппето, на аччантапарисуддхо арийапхалавипа̄ко.

сам̣кхиттасуттаван̣н̣ана̄ нит̣т̣хита̄.