2. т̣ха̄насуттаван̣н̣ана̄

192. дутийе сам̣ва̄сена̄ти сахава̄сена. сӣлам̣ ведитаббанти ‘‘айам̣ сусӣло ва̄ дуссӣло ва̄’’ти саха васантена упасан̇камантена джа̄нитаббо. тан̃ча кхо дӣгхена аддхуна̄, на иттаранти тан̃ча сӣлам̣ дӣгхена ка̄лена ведитаббам̣, на иттарена. двӣхатӣхан̃хи сам̣йата̄ка̄ро ча сам̣вутиндрийа̄ка̄ро ча на сакка̄ дассетум̣. манаси карота̄ти тампи ‘‘сӣламасса париггахесса̄мӣ’’ти манасикаронтена паччавеккхантенева сакка̄ джа̄нитум̣, на итарена. пан̃н̃авата̄ти тампи саппан̃н̃енева пан̣д̣итена. ба̄ло хи манасикаронтопи джа̄нитум̣ на саккоти.

сам̣воха̄рена̄ти апара̄парам̣ катханена.

‘‘йо хи кочи мануссесу, воха̄рам̣ упаджӣвати;

евам̣ ва̄сет̣т̣ха джа̄на̄хи, ва̄н̣иджо со на бра̄хман̣о’’ти. (ма. ни. 2.457; су. ни. 619) –

еттха хи бйаваха̄ро на̄ма. ‘‘чатта̄ро арийавоха̄ра̄, чатта̄ро анарийавоха̄ра̄’’ти (дӣ. ни. 3.313) еттха четана̄. ‘‘сан̇кха̄ саман̃н̃а̄ пан̃н̃атти воха̄ро’’ти (дха. са. 1313-1315; маха̄ни. 73) еттха пан̃н̃атти. ‘‘воха̄раматтена со вохареййа̄’’ти (сам̣. ни. 1.25) еттха катха̄воха̄ро. идха̄пи есова адхиппето. екаччасса хи саммукха̄катха̄ параммукха̄катха̄йа на самети параммукха̄катха̄ саммукха̄катха̄йа. татха̄ пуримакатха̄ паччхимакатха̄йа, паччхимакатха̄ ча пуримакатха̄йа. со катханенева сакка̄ джа̄нитум̣ ‘‘асучи есо пуггало’’ти. сучисӣласса пана пуримам̣ паччхимена, паччхиман̃ча пуримена самети. саммукха̄катхитам̣ параммукха̄катхитена самети, параммукха̄катхитан̃ча саммукха̄катхитена, тасма̄ катханена сакка̄ сучибха̄во джа̄нитунти пака̄сенто евама̄ха.

тха̄моти н̃а̄н̣атха̄мо. йасса хи н̃а̄н̣атха̄мо наттхи, со уппаннесу упаддавесу гахетаббам̣ гахан̣ам̣ каттаббам̣ киччам̣ апассанто адва̄ракагхарам̣ павит̣т̣хо вийа чарати. тена̄ха ‘‘а̄пада̄су, бхиккхаве, тха̄мо ведитаббо’’ти.

са̄каччха̄йа̄ти сам̣катха̄йа. дуппан̃н̃асса хи катха̄ удаке ген̣д̣у вийа уппилавати. пан̃н̃авато катхентасса пат̣ибха̄нам̣ анантам̣ хоти. удакавиппхандитенева хи маччхо кхуддако ва̄ маханто ва̄ти н̃а̄йати.

н̃а̄тивина̄соти чорарогабхайа̄дӣхи н̃а̄тӣнам̣ вина̄со. бхога̄нам̣ бйасанам̣ бхогабйасанам̣, ра̄джачора̄дивасена бхогавина̄соти аттхо. тена̄ха ‘‘дутийападепи есева найо’’ти. пан̃хуммагготи пан̃хагавесанам̣, н̃а̄тум̣ иччхитасса аттхасса вӣмам̣сананти аттхо. атаппаканти атиттикарат̣т̣хена атаппакам̣ са̄дурасабходжанам̣ вийа. сан̣ханти сукхумасабха̄вам̣.

т̣ха̄насуттаван̣н̣ана̄ нит̣т̣хита̄.