8. упакасуттаван̣н̣ана̄

188. ат̣т̣хаме ниббаттивасена нирайам̣ арахати, нирайасам̣ваттанийена ва̄ каммуна̄ нирайе нийуттоти нерайико. авӣчимхи уппаджджитва̄ таттха а̄йукаппасан̃н̃итам̣ антаракаппам̣ тит̣т̣хатӣти каппат̣т̣хо. нирайӯпапаттим̣ парихаран̣авасена тикиччхитум̣ асаккун̣еййоти атекиччхо. апарийа̄динна̄ва̄ти апариккхӣн̣а̄йева. саче хи еко бхиккху ка̄йа̄нупассанам̣ пуччхати, ан̃н̃о ведана̄нупассанам̣…пе… читта̄нупассанам̣. ‘‘имина̄ пут̣т̣хе ахам̣ пуччха̄мӣ’’ти еко екам̣ на олокети, евам̣ сантепи тесам̣ ва̄ро пан̃н̃а̄йати ева, буддха̄нам̣ пана ва̄ро на пан̃н̃а̄йати. видаттхичатуран̇гулам̣ чха̄йам̣ атиккаманато пуретарам̣йева бхагава̄ чуддасавидхена ка̄йа̄нупассанам̣, нававидхена ведана̄нупассанам̣, сол̣асавидхена читта̄нупассанам̣, пан̃чавидхена дхамма̄нупассанам̣ катхети. тит̣т̣ханту ва̄ евам̣ чатта̄ро. саче хи ан̃н̃е чатта̄ро саммаппадха̄несу, ан̃н̃е иддхипа̄десу, ан̃н̃е пан̃чиндрийесу, ан̃н̃е пан̃чабалесу, ан̃н̃е саттабоджджхан̇гесу, ан̃н̃е ат̣т̣хамагган̇гесу пан̃хе пуччхеййум̣, тампи бхагава̄ катхеййа. тит̣т̣ханту ва̄ ете ат̣т̣ха. саче ан̃н̃е саттатим̣са джана̄ бодхипаккхийесу пан̃хе пуччхеййум̣, тампи бхагава̄ та̄вадева катхеййа. касма̄? йа̄вата̄ хи локийамаха̄джане екам̣ падам̣ катхенте та̄ва а̄нандаттхеро ат̣т̣ха пада̄ни катхети. а̄нандаттхере пана екам̣ падам̣ катхентейева бхагава̄ сол̣аса пада̄ни катхети. касма̄? бхагавато хи дживха̄ муду, данта̄варан̣ам̣ супхуситам̣, вачанам̣ агал̣итам̣, бхаван̇гапарива̄со лахуко. тена вуттам̣ – ‘‘апарийа̄динна̄васса татха̄гатасса дхаммадесана̄, апарийа̄диннам̣ дхаммападабйан̃джана’’нти.

таттха дхаммадесана̄ти тантит̣т̣хапана̄. дхаммападабйан̃джананти еттха дхаммоти па̄л̣и. паджджати аттхо етена̄ти падам̣. ва̄кйан̃ча паденева сан̇гахитам̣. аттхам̣ бйан̃джетӣти бйан̃джанам̣, аккхарам̣. тан̃хи падава̄кйам̣ париччхиджджама̄нам̣ там̣ там̣ аттхам̣ бйан̃джети пака̄сети. етена апара̄парехи падабйан̃джанехи сучирампи ка̄лам̣ катхентасса татха̄гатасса на када̄чи тесам̣ парийа̄да̄нам̣ аттхӣти дассети. гун̣адхам̣сӣти гун̣адхам̣санасӣло. пагабботи ва̄ча̄па̄габбийена саманна̄гато.

упакасуттаван̣н̣ана̄ нит̣т̣хита̄.