3-4. пат̣хамакхатасутта̄диван̣н̣ана̄

3-4. татийе калинти апара̄дхам̣. вичина̄тӣти а̄чиноти пасавати. тена ча калина̄ сукхам̣ на пат̣илабхатӣти тена апара̄дхена сукхам̣ на виндати. ниндийаппасам̣са̄йа хи пасам̣сийанинда̄йа ча самакова випа̄ко. пасам̣сийанинда̄ти ча сампаннагун̣апаридхам̣санавасена паваттийа̄ маха̄са̄ваджджата̄йа кат̣укатаравипа̄ка̄. ниндийаппасам̣са̄ пана катхам̣ та̄йа самавипа̄ка̄ти че? тасмим̣ авиджджама̄нагун̣асама̄ропанена аттано паресан̃ча миччха̄пат̣ипаттихетубха̄вато пасам̣сийена тасса саббха̄вакаран̣ато ча. локепи хи асӯрам̣ сӯрена самам̣ каронто га̄райхо хоти, пагева дуппат̣ипаннам̣ суппат̣ипаннена самам̣ каронтоти. сакена дханена̄ти аттано са̄патеййена. аппаматтакова калӣти дит̣т̣хадхаммикатта̄ саппат̣ика̄ратта̄ ча аппаматтако апара̄дхо. айам̣…пе… махантатаро кали катӯпачитатта̄ сампара̄йикатта̄ аппат̣ика̄ратта̄ ча.

нираббудоти ган̣ана̄висесо есоти а̄ха ‘‘нираббудаган̣ана̄йа̄’’ти, сатасахассам̣ нираббуда̄ти аттхо. нираббудапарима̄н̣ам̣ пана вассаган̣ана̄йа евам̣ ведитаббам̣. йатхева хи сатам̣ сатасахасса̄нам̣ кот̣и хоти, евам̣ сатам̣ сатасахасса̄нам̣ кот̣ийо пакот̣и на̄ма хоти, сатам̣ сатасахасса̄нам̣ пакот̣ийо кот̣ипакот̣и, сатам̣ сатасахассакот̣ипакот̣ийо нахутам̣, сатам̣ сатасахассанахута̄ни ниннахутам̣, сатам̣ сатасахассаниннахута̄ни екам̣ аббудам̣, тато вӣсатигун̣итам̣ нираббудам̣. йам̣ арийе гараханто нирайам̣ упападжджатӣти арийе гараханто йам̣ нираббудасан̇кха̄там̣ нирайам̣ упападжджати, нираббудоти ча па̄т̣ийекко нирайо наттхи, авӣчимхийева пана нираббудаган̣ана̄йа паччитаббат̣т̣ха̄нассетам̣ на̄мам̣. чатуттхам̣ утта̄намева.

пат̣хамакхатасутта̄диван̣н̣ана̄ нит̣т̣хита̄.