7. ра̄хуласуттаван̣н̣ана̄

177. саттаме патхавӣдха̄туревеса̄ти дувидха̄песа̄ тхаддхат̣т̣хена, каккхал̣ат̣т̣хена, пхарусат̣т̣хена екалаккхан̣а̄ патхавӣдха̄ту ева̄ти аджджхаттикам̣ ба̄хира̄йа саддхим̣ йоджетва̄ дассети. касма̄? ба̄хира̄йа патхавӣдха̄туйа̄ ачетана̄бха̄во па̄кат̣о, на аджджхаттика̄йа, тасма̄ ба̄хира̄йа саддхим̣ екасадиса̄ ачетана̄йева̄ти ган̣хантасса сукхапаригга̄ха̄ хоти, йатха̄ ким̣? дантена гон̣ена саддхим̣ йоджито аданто катипа̄хамева висука̄йати виппхандати, атха на чирассева даматхам̣ упети, евам̣ аджджхаттикам̣ ба̄хира̄йа саддхим̣ екасадиса̄ти ган̣хантасса катипа̄хамева ачетанабха̄вена упат̣т̣ха̄ти, атха на чиреневасса̄ ачетанабха̄во па̄кат̣о хоти дха̄туматтата̄йа дассанато. нетам̣ мама…пе… дат̣т̣хаббанти там̣ убхайампи ‘‘на етам̣ мама, на есохамасми, на есо ме атта̄’’ти евам̣ йатха̄бхӯтам̣ саммаппан̃н̃а̄йа дат̣т̣хаббам̣. йатха̄бхӯтанти йатха̄сабха̄вам̣. тан̃хи аничча̄дисабха̄вам̣, тасма̄ аниччам̣ дуккхаманатта̄ти евам̣ дат̣т̣хаббанти аттхо. йасма̄ ‘‘нетам̣ мама, несохамасми, на месо атта̄’’ти пассанто нева каттхачи атта̄нам̣ пассати, на там̣ парасса кин̃чанабха̄ве упанетаббам̣ пассати, на парасса атта̄нам̣ аттано кин̃чанабха̄ве упанетаббам̣ пассати, тасма̄ вуттам̣ ‘‘чатукот̣икасун̃н̃ата̄ на̄ма катхита̄’’ти.

ра̄хуласуттаван̣н̣ана̄ нит̣т̣хита̄.