5-8. са̄ваджджасутта̄диван̣н̣ана̄

135-8. пан̃чаме са̄ваджджоти садосо. са̄ваджджена ка̄йакаммена̄ти садосена па̄н̣а̄типа̄та̄дина̄ ка̄йакаммена. итаресупи есева найо. айам̣ вуччатӣти айам̣ пуггало тӣхи два̄рехи а̄йӯханакаммасса садосатта̄ гӯтхакун̣апа̄дибхарито падесо вийа ‘‘са̄ваджджо’’ти вуччати. са̄ваджджена бахуланти йасса са̄ваджджамева ка̄йакаммам̣ бахулам̣ хоти, аппам̣ анаваджджам̣. со ‘‘са̄ваджджена бахулам̣ ка̄йакаммена саманна̄гато аппам̣ анаваджджена̄’’ти вуччати. итаресупи есева найо. ко пана еварӯпо хотӣти? йо га̄мадхаммата̄йа ва̄ нигамадхаммата̄йа ва̄ када̄чи карахачи упосатхам̣ сама̄дийати, сӣла̄ни пӯрети. айам̣ вуччатӣти айам̣ пуггало тӣхи два̄рехи а̄йӯханакаммесу са̄ваджджассева бахулата̄йа анаваджджасса аппата̄йа ‘‘ваджджабахуло’’ти вуччати. йатха̄ хи екасмим̣ падесе дуббан̣н̣а̄ни дуггандха̄ни пуппха̄ни ра̄сиката̄нассу, тесам̣ упари тахам̣ тахам̣ адхимуттакавассикапа̄т̣ала̄ни патита̄ни бхавеййум̣, еварӯпо айам̣ пуггало ведитаббо. йатха̄ пана екасмим̣ падесе адхимуттакавассикапа̄т̣ала̄ни ра̄сиката̄нассу, тесам̣ упари тахам̣ тахам̣ дуггандха̄ни бадарапуппха̄дӣни патита̄ни бхавеййум̣. еварӯпо татийо пуггало ведитаббо. чатуттхо пана тӣхи два̄рехи а̄йӯханакаммасса ниддосатта̄ ча чатумадхурабхаритасуван̣н̣ава̄ти вийа дат̣т̣хаббо. чхат̣т̣ха̄дӣни утта̄наттха̄нева.

са̄ваджджасутта̄диван̣н̣ана̄ нит̣т̣хита̄.