7. пат̣хамататха̄гатааччхарийасуттаван̣н̣ана̄

127. саттаме ваттама̄насамӣпе ваттама̄не вийа вохаритаббанти ‘‘оккаматӣ’’ти а̄ха ‘‘окканто хотӣти аттхо’’ти. дасасахассачаккава̄л̣апаттхаран̣о самуджджалабха̄вена ул̣а̄ро. дева̄нубха̄ванти дева̄нам̣ пабха̄нубха̄вам̣. дева̄нан̃хи пабхам̣ со обха̄со адхибхавати, на деве. тена̄ха ‘‘дева̄на’’нтиа̄ди. руккхагаччха̄дина̄ кеначи на хан̃н̃атӣти агха̄, асамба̄дха̄. тена̄ха ‘‘ниччавивара̄’’ти. асам̣вута̄ти хет̣т̣ха̄ упари кеначи апихита̄. тена̄ха ‘‘хет̣т̣ха̄пи аппатит̣т̣ха̄’’ти. таттха пи-саддена йатха̄ хет̣т̣ха̄ удакасса пидха̄йика̄ сандха̄рика̄ патхавӣ наттхи асам̣вута̄ локантарика̄, евам̣ упарипи чаккава̄л̣есу девавима̄на̄нам̣ абха̄вато асам̣вута̄ аппатит̣т̣ха̄ти дассети. андхака̄ро еттха аттхӣти андхака̄ра̄. чаккхувин̃н̃а̄н̣ам̣ на джа̄йати а̄локасса абха̄вато, на чаккхуно. татха̄ хи ‘‘тенобха̄сена ан̃н̃аман̃н̃ам̣ сан̃джа̄нантӣ’’ти вуттам̣. джамбудӣпе т̣хитамаджджханхикавела̄йа пуббавидехава̄сӣнам̣ аттхан̇гамавасена упад̣д̣хам̣ сӯрийаман̣д̣алам̣ пан̃н̃а̄йати, апарагойа̄нава̄сӣнам̣ уггаманавасена. евам̣ сесадӣпесупӣти а̄ха ‘‘екаппаха̄ренева тӣсу дӣпесу пан̃н̃а̄йантӣ’’ти. ито ан̃н̃атха̄ двӣсу ева дӣпесу пан̃н̃а̄йанти. екека̄йа диса̄йа наванавайоджанасатасахасса̄ни андхака̄равидхаманампи имина̄ва найена дат̣т̣хаббам̣. пабха̄йа наппахонтӣти аттано пабха̄йа обха̄ситум̣ на̄бхисамбхун̣анти. йугандхарапаббатаматтхакасамаппама̄н̣е а̄ка̄се вичаран̣ато ‘‘чаккава̄л̣апаббатасса вемаджджхена чарантӣ’’ти вуттам̣.

бйа̄ват̣а̄ти кха̄данаттхам̣ ган̣хитум̣ упаккаманта̄. випариваттитва̄ти виват̣т̣итва̄. чхиджджитва̄ти муччха̄паваттийа̄ т̣хитат̣т̣ха̄нато муччитва̄, ан̇гапаччан̇гачхеданавасена ва̄ чхиджджитва̄. аччантакха̄рети а̄тапасантапа̄бха̄вена атисӣтабха̄вам̣ сандха̄йа аччантакха̄рата̄ вутта̄ сийа̄. на хи там̣ каппасан̣т̣ха̄наудакам̣ сампаттикарамаха̄мегхавут̣т̣хам̣ патхависандха̄ракам̣ каппавина̄сакаудакам̣ вийа кха̄рам̣ бхавитумарахати, татха̄ сати патхавӣпи вилӣйеййа, тесам̣ ва̄ па̄пакаммапхалена пета̄нам̣ пакатиудакасса пуббакхел̣абха̄ва̄патти вийа тасса удакасса кха̄рабха̄ва̄патти хотӣти вуттам̣ ‘‘аччантакха̄ре удаке’’ти.

пат̣хамататха̄гатааччхарийасуттаван̣н̣ана̄ нит̣т̣хита̄.