1-2. вала̄хакасуттадвайаван̣н̣ана̄

101-2. татийапан̣н̣а̄сакасса пат̣хаме гаджджита̄ти тханита̄. таттха гаджджитва̄ новассанабха̄во на̄ма па̄пако. манусса̄ хи йада̄ дево гаджджати, тада̄ ‘‘сувут̣т̣хита̄ бхависсатӣ’’ти бӣджа̄ни нӣхаритва̄ вапанти. атха деве авассанте кхетте бӣджа̄ни кхеттейева нассанти, гехе бӣджа̄ни гехейева нассантӣти дуббхиккхам̣ хоти. ногаджджитва̄ вассанабха̄вопи па̄пако. манусса̄ хи имасмим̣ ка̄ле ‘‘дуббут̣т̣хика̄ бхависсатӣ’’ти ниннат̣т̣ха̄несуйева ваппам̣ каронти. атха дево васситва̄ саббабӣджа̄ни маха̄самуддам̣ па̄пети, дуббхиккхамева хоти. гаджджитва̄ вассанабха̄во пана бхаддако. тада̄ хи субхиккхам̣ хоти. ногаджджитва̄ новассанабха̄во екантапа̄пакова. бха̄сита̄ хоти но катта̄ти ‘‘ида̄ни гантхадхурам̣ пӯресса̄ми, ва̄садхурам̣ пӯресса̄мӣ’’ти катхетийева, на уддесам̣ ган̣ха̄ти, на каммат̣т̣ха̄нам̣ бха̄вети.

катта̄ хоти но бха̄сита̄ти ‘‘гантхадхурам̣ пӯресса̄ми, ва̄садхурам̣ ва̄’’ти на бха̄сати, сампатте пана ка̄ле саматтам̣ сампа̄дети. имина̄ найена итарепи ведитабба̄. атха ва̄ саббам̣ панетам̣ паччайада̄йакехева катхитам̣. еко хи ‘‘асукадивасе на̄ма да̄нам̣ дасса̄мӣ’’ти сан̇гхам̣ нимантети, сампатте ка̄ле но кароти. айам̣ пуггало пун̃н̃ена париха̄йати, бхиккхусан̇гхо пана ла̄бхена париха̄йати. апаро сан̇гхам̣ анимантетва̄ сакка̄рам̣ катва̄ ‘‘бхиккхӯ а̄несса̄мӣ’’ти на лабхи, саббе ан̃н̃аттха нимантита̄ хонти. айампи пун̃н̃ена париха̄йати, сан̇гхопи ла̄бхена париха̄йати. апаро пат̣хамам̣ сан̇гхам̣ нимантетва̄ паччха̄ сакка̄рам̣ катва̄ да̄нам̣ дети, айам̣ киччака̄рӣ хоти. апаро нева сан̇гхам̣ нимантети, на да̄нам̣ дети, айам̣ па̄папуггалоти ведитаббо. дутийам̣ утта̄намева.

вала̄хакасуттадвайаван̣н̣ана̄ нит̣т̣хита̄.