8. ан̃н̃атиттхийасуттаван̣н̣ана̄

69. ат̣т̣хаме бхагава̄ мӯлам̣ ка̄ран̣ам̣ етесам̣ йа̄тха̄вато адхигама̄йа̄ти бхагавам̣мӯлака̄. тена̄ха ‘‘бхагавантан̃хи нисса̄йа майам̣ име дхамме а̄джа̄на̄ма пат̣ивиджджха̄ма̄’’ти. амха̄кам̣ дхамма̄ти техи аттана̄ адхигантаббата̄йа вуттам̣. севитабба̄севитабба̄нан̃хи йа̄тха̄вато адхигаман̃н̃а̄н̣а̄ни адхигаччханакасамбандхӣни, та̄ни ча самма̄самбуддхамӯлака̄ни анан̃н̃ависайатта̄. тена̄ха ‘‘пуббе кассапасамма̄самбуддхена̄’’тиа̄ди. име дхамма̄ти име н̃а̄н̣адхамма̄. а̄джа̄на̄ма̄ти абхимукхам̣ паччаккхато джа̄на̄ма. пат̣ивиджджха̄ма̄ти тассева вевачанам̣, адхигаччха̄ма̄ти аттхо. бхагава̄ нета̄ етесанти бхагавам̣неттика̄. нета̄ти севитаббадхамме венеййасанта̄нам̣ па̄пета̄. винета̄ти асевитаббадхамме венеййасанта̄нато апанета̄. тадан̇гавинайа̄дивасена ва̄ винета̄. атха ва̄ йатха̄ аламарийан̃а̄н̣адассанависесо хоти, евам̣ висесато нета̄. анунета̄ти ‘‘име дхамма̄ севитабба̄, име на севитабба̄’’ти убхайасампа̄пана̄панайанаттхам̣ пан̃н̃а̄пета̄. тена̄ха ‘‘йатха̄сабха̄вато’’тиа̄ди.

пат̣исаранти еттха̄ти пат̣исаран̣ам̣, бхагава̄ пат̣исаран̣ам̣ етесанти бхагавам̣пат̣исаран̣а̄. а̄па̄тхам̣ упагаччханта̄ хи бхагава̄ пат̣исаран̣ам̣ самосаран̣ат̣т̣ха̄нам̣. тена̄ха ‘‘чатубхӯмакадхамма̄’’тиа̄ди. пат̣исарати сабха̄васампат̣иведхавасена паччекам̣ упагаччхатӣти ва̄ пат̣исаран̣ам̣, бхагава̄ пат̣исаран̣ам̣ етесанти бхагавам̣пат̣исаран̣а̄. пат̣исарати пат̣ивиджджхатӣти ва̄ пат̣исаран̣ам̣, тасма̄ пат̣ивиджджханавасена бхагава̄ пат̣исаран̣ам̣ етесанти бхагавам̣пат̣исаран̣а̄. тена̄ха ‘‘апича̄’’тиа̄ди. пат̣иведхавасена̄ти пат̣ивиджджхитаббата̄васена. асатипи мукхе аттхато евам̣ ваданто вийа хотӣти а̄ха ‘‘пхассо а̄гаччхати ахам̣ бхагава̄ кинна̄мо’’ти. пхассо н̃а̄н̣асса а̄па̄тхам̣ а̄гаччхантойева хи аттано ‘‘ахам̣ кинна̄мо’’ти на̄мам̣ пуччханто вийа, бхагава̄ часса на̄мам̣ каронто вийа хоти.

пат̣ибха̄тӯти еттха пат̣исадда̄пеккха̄йа ‘‘бхагаванта’’нти упайогавачанам̣, аттхо пана са̄мивачанавасенева ведитабботи дассенто а̄ха ‘‘бхагавато’’ти. пат̣ибха̄тӯти ча бха̄го хоту. бхагавато хи еса бха̄го, йадидам̣ дхаммасса десана̄, амха̄кам̣ пана бха̄го савананти адхиппа̄йо. еван̃хи саддалаккхан̣ена самети. кечи пана пат̣ибха̄тӯти падасса диссатӯти аттхам̣ ваданти, н̃а̄н̣ена диссату, десӣйатӯти ва̄ аттхо. упат̣т̣ха̄тӯти н̃а̄н̣асса паччупатит̣т̣хату. па̄л̣ийам̣ ко адхиппайа̄соти еттха ко адхикаппайоготи аттхо.

локаваджджавасена̄ти локийаджанехи пакатийа̄ гарахитаббаваджджавасена. випа̄каваджджавасена̄ти випа̄касса апа̄йасам̣ваттаникаваджджавасена. катхантиа̄дина̄ убхайаваджджавасенапи аппаса̄ваджджата̄йа висайам̣ дассети. сесаметтха сувин̃н̃еййамева.

ан̃н̃атиттхийасуттаван̣н̣ана̄ нит̣т̣хита̄.