2. а̄нандасуттаван̣н̣ана̄

32. дутийе татха̄джа̄тикоти татха̄сабха̄во. читтекаггата̄ла̄бхоти читтекаггата̄йа адхигамо. рӯпамева килесуппаттийа̄ ка̄ран̣абха̄вато рӯпанимиттам̣. еса найо сесесупи. сассата̄динимиттанти сассатуччхедабха̄ванимиттам̣. пуггаланимиттанти пуггала̄бхинивесананимиттам̣. дхамманимиттанти дхамма̄рамман̣асан̇кха̄там̣ нимиттам̣. ‘‘сийа̄ ну кхо, бханте’’ти тхерена пут̣т̣хо бхагава̄ ‘‘сийа̄’’ти авоча локуттарасама̄дхиппат̣ила̄бхам̣ сандха̄йа. со хи нибба̄нам̣ сантам̣ пан̣ӣтанти ча пассати. тена̄ха ‘‘идха̄нанда̄’’тиа̄ди.

нибба̄нам̣ сантанти сама̄паттим̣ аппетва̄ти нибба̄нам̣ сантанти а̄бхуджитва̄ пхаласама̄паттим̣ аппетва̄. дивасампӣтиа̄дина̄ асан̇кхата̄йа дха̄туйа̄ аччантасантапан̣ӣта̄дибха̄вам̣ дассети. ат̣т̣хавидхети ‘‘сантам̣ пан̣ӣтам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’’нти евам̣ ат̣т̣хавидхе а̄бхогасан̃н̃ите саманна̄ха̄ре. ниддха̄ран̣е четам̣ бхуммам̣. имасмим̣ т̣ха̄не…пе… лаббхантева̄ти ‘‘идха̄нанда, бхиккхуно евам̣ хотӣ’’ти а̄гате имасмим̣ суттаппадесе екопи а̄бхогасаманна̄ха̄ро чепи саббе ат̣т̣хапи а̄бхогасаманна̄ха̄ра̄ лаббхантева саманна̄харатам̣ аттха̄вахатта̄.

н̃а̄н̣ена джа̄нитва̄ти випассана̄н̃а̄н̣асахитена магган̃а̄н̣ена джа̄нитва̄. пара̄ни ча опара̄ни ча чаккха̄дӣни а̄йатана̄ни. сантата̄йа̄ти пат̣иппассаддхита̄йа. ка̄йадуччарита̄дидхӯмавирахитоти ка̄йадуччарита̄ди ева санта̄панат̣т̣хена дхӯмо, тена вирахито. анӣгхоти апа̄по. джа̄тиджара̄гахан̣енева бйа̄дхимаран̣ампи гахитамева̄ти таббха̄вабха̄ватоти вуттам̣.

а̄нандасуттаван̣н̣ана̄ нит̣т̣хита̄.