5. випаттисампада̄суттаван̣н̣ана̄

118. пан̃чаме диннанти деййадхаммасӣсена да̄нам̣ вуттанти а̄ха ‘‘диннасса пхала̄бха̄вам̣ сандха̄йа вадатӣ’’ти. диннам̣ пана анна̄диваттхум̣ катхам̣ пат̣иккхипати. еса найо ‘‘йит̣т̣хам̣ хута’’нти еттха̄пи. маха̄йа̄готи саббаса̄дха̄ран̣ам̣ маха̄да̄нам̣. пахен̣акасакка̄роти па̄хунака̄нам̣ ка̄таббасакка̄ро. пхаланти а̄нисам̣сапхалам̣ ниссандапхалан̃ча. випа̄коти садисапхалам̣. паралоке т̣хитасса айам̣ локо наттхӣти паралоке т̣хитасса каммуна̄ ладдхаббо айам̣ локо на хоти. идхалоке т̣хитассапи паралоко наттхӣти идхалоке т̣хитасса каммуна̄ ладдхаббо паралоко на хоти. таттха ка̄ран̣ама̄ха ‘‘саббе таттха таттхева уччхиджджантӣ’’ти. име сатта̄ йаттха йаттха бхавайонигатиа̄дӣсу т̣хита̄, таттха таттхева уччхиджджанти, двайавина̄сена винассанти.

пхала̄бха̄вавасена̄ти ма̄та̄питӯсу самма̄пат̣ипаттимиччха̄пат̣ипаттӣнам̣ пхаласса абха̄вавасена ‘‘наттхи ма̄та̄, наттхи пита̄’’ти вадати, на ма̄та̄питӯнам̣, на̄пи тесу самма̄пат̣ипаттимиччха̄пат̣ипаттӣнам̣ абха̄вавасена тесам̣ локапаччаккхатта̄. пуббул̣акасса вийа имесам̣ сатта̄нам̣ уппа̄до на̄ма кевало, на ча кханапуббакоти дассанаттхам̣ ‘‘наттхи сатта̄ опапа̄тика̄’’ти вуттанти а̄ха ‘‘чавитва̄ уппаджджанака̄ сатта̄ на̄ма наттхӣти вадатӣ’’ти. сайам̣ абхин̃н̃а̄ саччхикатва̄ паведентӣти йе иман̃ча локам̣ паран̃ча локам̣ абхивисит̣т̣ха̄йа пан̃н̃а̄йа сайам̣ паччаккхам̣ катва̄ паведенти, те наттхӣти саббан̃н̃убуддха̄нам̣ абха̄вам̣ дӣпети.

випаттисампада̄суттаван̣н̣ана̄ нит̣т̣хита̄.