8. поттхакасуттаван̣н̣ана̄

100. ат̣т̣хаме навоти навава̄йимо. тена̄ха ‘‘каран̣ам̣ упа̄да̄йа вуччатӣ’’ти. ва̄камайаваттханти са̄н̣а̄дива̄каса̄т̣акам̣. дуббан̣н̣оти виван̣н̣о. дуккхасампхассоти кхарасампхассо. аппам̣ аггхатӣти аппаггхо. атибахум̣ аггханто каха̄пан̣аггханако хоти. парибхогамаджджхимоти парибхогака̄лавасена маджджхимо. со хи навабха̄вам̣ атиккамитва̄ джин̣н̣абха̄вам̣ аппатто маджджхе парибхогака̄лепи дуббан̣н̣о ча дуккхасампхассо ча аппаггхойева хоти. атибахум̣ аггханто ад̣д̣хам̣ аггхати, джин̣н̣ака̄ле пана ад̣д̣хама̄сакам̣ ва̄ ка̄кан̣икам̣ ва̄ аггхати. уккхалипарипун̃чхананти ка̄л̣уккхалипарипун̃чханам̣. навотипи упасампада̄йа пан̃чавассака̄лато хет̣т̣ха̄ джа̄тийа̄ сат̣т̣хивассопи навойева. дуббан̣н̣ата̄йа̄ти сарӣраван̣н̣енапи гун̣аван̣н̣енапи дуббан̣н̣ата̄йа. дуссӣласса хи парисамаджджхе ниттеджата̄йа сарӣраван̣н̣опи на сампаджджати, гун̣аван̣н̣ена ваттаббамева наттхи. ат̣т̣хакатха̄йам̣ пана сарӣраван̣н̣ена дуббан̣н̣ата̄пи гун̣аван̣н̣асса абха̄вена дуббан̣н̣ата̄йа̄ти вуттам̣.

йе кхо панасса̄ти йе кхо пана тасса упат̣т̣ха̄ка̄ ва̄ н̃а̄тимитта̄дайо ва̄ етам̣ пуггалам̣ севанти. тесанти тесам̣ пуггала̄нам̣ чха саттха̄ре севанта̄нам̣ миччха̄дит̣т̣хика̄нам̣ вийа. девадатте севанта̄нам̣ кока̄лика̄дӣнам̣ вийа ча там̣ севанам̣ дӣгхараттам̣ ахита̄йа дуккха̄йа хоти. маджджхимоти пан̃чавассака̄лато пат̣т̣ха̄йа йа̄ва нававассака̄ла̄ маджджхимо на̄ма. тхероти дасавассато пат̣т̣ха̄йа тхеро на̄ма. евама̄хам̣сӯти евам̣ ваданти. ким̣ ну кхо туйханти туйхам̣ ба̄ласса бхан̣итена ко аттхоти вуттам̣ хоти. татха̄рӯпанти татха̄джа̄тикам̣ татха̄сабха̄вам̣ уккхепанӣйакаммасса ка̄ран̣абхӯтам̣.

тӣхи каппа̄саам̣сӯхи суттам̣ кантитва̄ катаваттханти тайо каппа̄саам̣сӯ гахетва̄ кантитасуттена ва̄йитам̣ сукхумаваттхам̣, там̣ навава̄йимам̣ анаггхам̣ хоти, парибхогамаджджхимам̣ вӣсампи тим̣сампи сахасса̄ни аггхати, джин̣н̣ака̄ле, ат̣т̣хапи дасапи сахасса̄ни аггхати.

тесам̣ там̣ хотӣти тесам̣ самма̄самбуддха̄дайо севанта̄ вийа там̣ севанам̣ дӣгхараттам̣ хита̄йа сукха̄йа хоти. самма̄самбуддхан̃хи екам̣ нисса̄йа йа̄ваджджака̄ла̄ муччанакасатта̄нам̣ пама̄н̣ам̣ наттхи, татха̄ са̄рипуттаттхерамаха̄моггалла̄наттхере авасесе ча асӣти маха̄са̄ваке нисса̄йа саггагатасатта̄нам̣ пама̄н̣ам̣ наттхи, йа̄ваджджака̄ла̄ тесам̣ дит̣т̣ха̄нугатим̣ пат̣ипаннасатта̄нампи пама̄н̣ам̣ наттхийева. а̄дхеййам̣ гаччхатӣти тасса маха̄тхерасса там̣ аттханисситам̣ вачанам̣ йатха̄ гандхакаран̣д̣аке ка̄сикаваттхам̣ а̄дха̄таббатам̣ т̣хапетаббатам̣ гаччхати, евам̣ уттаман̇ге сирасмим̣ хадайе ча а̄дха̄таббатам̣ т̣хапетаббатам̣ гаччхати.

поттхакасуттаван̣н̣ана̄ нит̣т̣хита̄.