(6) 1. пуггалаваггаван̣н̣ана̄

53. дутийапан̣н̣а̄сакасса пат̣хаме хитаггахан̣ена метта̄ вутта̄ хоти, на карун̣а̄, анукампа̄гахан̣ена пана карун̣а̄ти чаккаваттина̄ саддхим̣ гахитатта̄ ‘‘лока̄нукампа̄йа̄’’ти на вуттам̣. ниппарийа̄йато лока̄нукампа̄ на̄ма самма̄самбуддха̄дхӣна̄ти. двети мануссадевасампаттивасена две сампаттийо. та̄ две, нибба̄насампатти ча̄ти тиссо.

54. дутийе бахусо локе на чин̣н̣а̄ на паватта̄ манусса̄ти а̄чин̣н̣аманусса̄. када̄чидева хи несам̣ локе ниббатти абхӯтапубба̄ бхӯта̄ти аббхутаманусса̄.

55. татийе дасасу чаккава̄л̣асахассесу анута̄пам̣ кароти тасса екабуддхакхеттабха̄вато.

56. чатуттхе тхӯпасса йутта̄ти дха̄туйо паккхипитва̄ тхӯпакаран̣асса йутта̄.

57. пан̃чаме аттано а̄нубха̄вена̄ти сайамбхун̃а̄н̣ена. буддха̄ти буддхаванто.

58. чхат̣т̣хе пахӣнатта̄ на бха̄йатӣти аттасинеха̄бха̄вато на бха̄йати. сакка̄йадит̣т̣хиггахан̣ан̃четтха нидассанаматтам̣, аттасинехасса пат̣игхасса тадекат̣т̣хасаммохасса ча васена бха̄йанам̣ хотӣти тесампи пахӣнатта̄ на бха̄йати, ан̃н̃атха̄ сота̄панна̄дӣнам̣ абхайена бхавитаббам̣ сийа̄. сакка̄йадит̣т̣хийа̄ балаватта̄ти еттха ахам̣ка̄расаммоханата̄дӣнампи балаватта̄ти ваттаббам̣.

59. саттаме асса̄джа̄нӣйоти ликханти, усабха̄джа̄нӣйоти пана па̄т̣хоти.

61. наваме таттха̄ти антара̄пан̣е. екоти двӣсу киннаресу еко. амбилика̄пхалан̃ча аддаса̄ти а̄нетва̄ самбандхо. амбилика̄пхаланти тинтин̣ӣпхаланти ваданти, чатурамбиланти апаре. две аттхети па̄л̣ийам̣ вутте две аттхе.

62. дасаме йатха̄а̄раддхе кичче ваттама̄не антара̄ ева пат̣игаманам̣ пат̣ива̄нам̣, наттхи етасса пат̣ива̄нанти аппат̣ива̄но. таттха асам̣кочаппатто. тена̄ха ‘‘ануккан̣т̣хито’’тиа̄ди.

63. ека̄дасаме саннива̄санти сахава̄сам̣. йатха̄ асаппуриса̄ саха васанта̄ ан̃н̃аман̃н̃ам̣ ага̄равена ана̄дарийам̣ каронти, таппат̣иккхепена саппуриса̄нам̣ сага̄раваппат̣ипаттидассанапарамидам̣ суттам̣ дат̣т̣хаббам̣.

64. два̄дасаме двӣсупи паккхесӯти вива̄да̄панна̄нам̣ бхиккхӯнам̣ двӣсупи паккхесу. сам̣сарама̄на̄ти паваттама̄на̄. дит̣т̣хипал̣а̄соти дит̣т̣хисанниссайо пал̣а̄со йугагга̄хо. а̄гха̄тентоти а̄хананто ба̄дхенто. анабхира̄дханавасена̄ти йасса уппаджджати, тасса тадан̃н̃есан̃ча аттхасса анабхира̄дханавасена. саббампетанти вачӣсам̣са̄роти саббампетам̣. аттано читте париса̄йа ча читтети а̄нетва̄ самбандхо.

пуггалаваггаван̣н̣ана̄ нит̣т̣хита̄.