(7) 2. сукхаваггаван̣н̣ана̄

65. дутийасса пат̣хаме саббака̄маниппхаттимӯлакам̣ сукханти анавасесаупабхогапарибхогаваттхуниппхаттихетукам̣ ка̄масукхам̣. паббаджджа̄мӯлакам̣ сукханти паббаджджа̄хетукам̣ павивекасукхам̣.

66. дутийе ка̄мети пан̃ча ка̄магун̣е, саббепи ва̄ тебхӯмаке дхамме. вуттан̃хетам̣ ‘‘саббепи тебхӯмака̄ дхамма̄ каманӣйат̣т̣хена ка̄ма̄’’ти (маха̄ни. 1). неккхаммам̣ вуччати паббаджджа̄ гхарабандханато никкхантатта̄. нибба̄намева ва̄ –

‘‘паббаджджа̄ пат̣хамам̣ джха̄нам̣, нибба̄нан̃ча випассана̄;

саббепи кусала̄ дхамма̄, неккхамманти павуччаре’’ти. (итиву. ат̣т̣ха. 109) –

хи вуттам̣.

67. татийе упадхӣ вуччанти пан̃чупа̄да̄наккхандха̄, таннисситам̣ сукхам̣ упадхисукхам̣. таппат̣ипаккхато нирупадхисукхам̣ локуттарасукхам̣.

68. чатуттхе ват̣т̣апарийа̄паннам̣ сукхам̣ ват̣т̣асукхам̣. нибба̄на̄рамман̣ам̣ сукхам̣ виват̣т̣асукхам̣.

69. пан̃чаме сам̣килесанти сам̣килит̣т̣хам̣. тена̄ха ‘‘ват̣т̣ага̄мисукха’’нти. виват̣т̣асукханти маггапхаласахагатам̣ сукхам̣.

70. чхат̣т̣хе арийа̄намева сукхам̣ арийасукхам̣, арийан̃ча там̣ сукхан̃ча̄типи арийасукхам̣. анарийа̄намева сукхам̣ анарийасукхам̣. анарийан̃ча там̣ сукхан̃ча̄типи анарийасукхам̣.

71. саттаме танти четасикасукхам̣.

72. ат̣т̣хаме саха пӣтийа̄ ваттатӣти саппӣтикам̣, пӣтисахагатам̣ сукхам̣. сабха̄вато вира̄гато ча наттхи етасса пӣтӣти ниппӣтикам̣ сукхам̣. ат̣т̣хакатха̄йам̣ панеттха джха̄насукхамева уддхат̣ам̣, татха̄ ча ‘‘локийасаппӣтикасукхато локийаниппӣтикасукхам̣ агга’’нти вуттам̣. локийаниппӣтикампи хи аггам̣ лаббхатева̄ти бхӯмантарам̣ бхиндитва̄ аггабха̄во ведитаббо.

73. наваме са̄тасабха̄вамева сукхам̣ са̄тасукхам̣, на упеккха̄сукхам̣ вийа аса̄тасабха̄вам̣. ка̄ман̃четтха ка̄йавин̃н̃а̄н̣асахагатампи са̄тасукхамева, ат̣т̣хакатха̄йам̣ пана ‘‘тӣсу джха̄несу сукха’’нтева вуттам̣.

74. дасаме сама̄дхисампайуттам̣ сукхам̣ сама̄дхисукхам̣. на сама̄дхисампайуттам̣ сукхам̣ асама̄дхисукхам̣.

75. ека̄дасаме суттантакатха̄ еса̄ти ‘‘саппӣтикам̣ джха̄надвайа’’нти вуттам̣.

77. терасаме рӯпаджджха̄нам̣ рӯпам̣ уттарападалопена, там̣ а̄рамман̣ам̣ етасса̄ти рӯпа̄рамман̣ам̣. чатуттхаджджха̄наггахан̣ам̣ пана йадасса пат̣ийогӣ, тена сама̄найогаккхамадассанапарам̣. йам̣ кин̃чи рӯпанти йам̣ кин̃чи руппаналаккхан̣ам̣ рӯпам̣. таппат̣иккхепена арӯпам̣ ведитаббам̣.

сукхаваггаван̣н̣ана̄ нит̣т̣хита̄.