8. суккасуттаван̣н̣ана̄

8. ат̣т̣хаме ‘‘суккам̣ ваттха’’нтиа̄дӣсу вийа на ван̣н̣асукката̄йа дхамма̄нам̣ сукката̄, атха кхо сукка̄бхиджа̄тихетуто пабхассарабха̄вакаран̣ато ча̄ти дассенто ‘‘на ван̣н̣асукката̄йа̄’’тиа̄дима̄ха. сукката̄йа̄ти сукка̄бхиджа̄тита̄йа. хирӣ па̄падхамме гӯтхам̣ вийа пассантӣ джигуччхатӣти а̄ха ‘‘па̄пато джигуччханалаккхан̣а̄ хирӣ’’ти. оттаппам̣ те ун̣хам̣ вийа пассантам̣ тато бха̄йатӣти вуттам̣ ‘‘бха̄йаналаккхан̣ам̣ отаппа’’нти. идан̃ча хироттаппам̣ ан̃н̃аман̃н̃авиппайогӣ па̄пато вимукхабхӯтан̃ча, тасма̄ несам̣ идам̣ на̄на̄каран̣ам̣ – аджджхаттасамут̣т̣ха̄на̄ хирӣ, бахиддха̄самут̣т̣ха̄нам̣ оттаппам̣. атта̄дхипати хирӣ, лока̄дхипати отаппам̣. ладжджа̄сабха̄васан̣т̣хита̄ хирӣ, бхайасабха̄васан̣т̣хитам̣ оттаппам̣. саппатиссавалаккхан̣а̄ хирӣ, ваджджабхӣрукабхайадасса̄вилаккхан̣ам̣ оттаппанти.

таттха аджджхаттасамут̣т̣ха̄нам̣ хирим̣ чатӯхи ка̄ран̣ехи самут̣т̣ха̄пети джа̄тим̣ паччавеккхитва̄, вайам̣, сӯрабха̄вам̣, ба̄хусаччам̣ паччавеккхитва̄. катхам̣? ‘‘па̄пакаран̣ам̣ на̄метам̣ на джа̄тисампанна̄нам̣ каммам̣, хӣнаджачча̄нам̣ кеват̣т̣а̄дӣнам̣ каммам̣, ма̄дисасса джа̄тисампаннасса идам̣ ка̄тум̣ на йутта’’нти евам̣ та̄ва джа̄тим̣ паччавеккхитва̄ па̄пам̣ акаронто хирим̣ самут̣т̣ха̄пети. татха̄ ‘‘па̄пакаран̣ам̣ на̄метам̣ дахарехи каттаббам̣ каммам̣, ма̄дисасса вайе т̣хитасса идам̣ ка̄тум̣ на йутта’’нти евам̣ вайам̣ паччавеккхитва̄ па̄пам̣ акаронто хирим̣ самут̣т̣ха̄пети. татха̄ ‘‘па̄пакаран̣ам̣ на̄метам̣ дуббаладжа̄тика̄нам̣ каммам̣, ма̄дисасса сӯрабха̄васампаннасса идам̣ ка̄тум̣ на йутта’’нти евам̣ сӯрабха̄вам̣ паччавеккхитва̄ па̄пам̣ акаронто хирим̣ самут̣т̣ха̄пети. татха̄ ‘‘па̄пакаммам̣ на̄метам̣ андхаба̄ла̄нам̣ каммам̣, на пан̣д̣ита̄нам̣, ма̄дисасса пан̣д̣итасса бахуссутасса идам̣ ка̄тум̣ на йутта’’нти евам̣ ба̄хусаччам̣ паччавеккхитва̄ па̄пам̣ акаронто хирим̣ самут̣т̣ха̄пети. евам̣ аджджхаттасамут̣т̣ха̄нам̣ хирим̣ чатӯхи ка̄ран̣ехи самут̣т̣ха̄пети, самут̣т̣ха̄пенто ча хирим̣ нисса̄йа па̄пакаммам̣ на кароти.

катхам̣ бахиддха̄самут̣т̣ха̄нам̣ оттаппам̣? ‘‘саче твам̣ па̄пакаммам̣ кариссаси, чатӯсу париса̄су гарахаппатто бхависсаси, тато там̣ сӣлаванто сабрахмача̄рӣ виваджджиссантӣ’’ти паччавеккхитва̄ бахиддха̄самут̣т̣ха̄нам̣ оттаппам̣ нисса̄йа па̄пакаммам̣ на кароти. евам̣ бахиддха̄самут̣т̣ха̄нам̣ оттаппам̣.

катхам̣ атта̄дхипати хирӣ? идхекаччо кулапутто атта̄нам̣ адхипатим̣ джет̣т̣хакам̣ катва̄ ‘‘ма̄дисасса саддха̄паббаджитасса бахуссутасса дхутадхарасса на йуттам̣ па̄пакаммам̣ ка̄ту’’нти па̄пам̣ на кароти. евам̣ атта̄дхипати хирӣ. тена̄ха бхагава̄ ‘‘со атта̄нам̣йева адхипатим̣ каритва̄ акусалам̣ паджахати, кусалам̣ бха̄вети, са̄ваджджам̣ паджахати, анаваджджам̣ бха̄вети, суддхам̣ атта̄нам̣ парихаратӣ’’ти (а. ни. 3.40).

катхам̣ лока̄дхипати оттаппам̣? идхекаччо кулапутто локам̣ адхипатим̣ джет̣т̣хакам̣ катва̄ ‘‘саче кхо твам̣ па̄пакаммам̣ кареййа̄си, сабрахмача̄рино та̄ва там̣ джа̄ниссанти, махиддхика̄ маха̄нубха̄ва̄ локе ча саман̣абра̄хман̣а̄ девата̄ ча, тасма̄ те на йуттам̣ па̄пам̣ ка̄ту’’нти па̄пакаммам̣ на кароти. йатха̄ха – ‘‘маха̄ кхо пана̄йам̣ локасаннива̄со, махантасмим̣ кхо пана локасаннива̄се санти саман̣абра̄хман̣а̄ иддхиманто диббачаккхука̄ парачиттавидуно. те дӯратопи пассанти, а̄санна̄пи на диссанти, четаса̄пи читтам̣ джа̄нанти, тепи мам̣ евам̣ джа̄ниссанти ‘пассатха, бхо, имам̣ кулапуттам̣, саддха̄ ага̄расма̄ анага̄рийам̣ паббаджито сама̄но вокин̣н̣о вихарати па̄пакехи акусалехи дхаммехӣ’ти. санти девата̄ иддхимантинийо диббачаккхука̄ парачиттавидунийо, та̄ дӯратопи пассанти, а̄санна̄пи на диссанти, четаса̄пи читтам̣ джа̄нанти, та̄пи мам̣ джа̄ниссанти ‘пассатха, бхо, имам̣ кулапуттам̣, саддха̄ ага̄расма̄ анага̄рийам̣ паббаджито сама̄но вокин̣н̣о вихарати па̄пакехи акусалехи дхаммехӣ’ти…пе… со локам̣йева адхипатим̣ каритва̄ акусалам̣…пе… парихаратӣ’’ти. евам̣ лока̄дхипати оттаппам̣.

ладжджа̄сабха̄васан̣т̣хита̄ти еттха ладжджа̄ти ладжджана̄ка̄ро, тена сабха̄вена сан̣т̣хита̄ хирӣ. бхайанти апа̄йабхайам̣, тена сабха̄вена сан̣т̣хитам̣ оттаппам̣. тадубхайам̣ па̄папариваджджане па̄кат̣ам̣ хоти. таттха йатха̄ двӣсу айогул̣есу еко сӣтало бхавеййа гӯтхамаккхито, еко ун̣хо а̄дитто. тесу йатха̄ сӣталам̣ гӯтхамаккхитатта̄ джигуччханто вин̃н̃уджа̄тико на ган̣ха̄ти, итарам̣ д̣а̄хабхайена. евам̣ пан̣д̣ито ладжджа̄йа джигуччханто па̄пам̣ на кароти, оттаппена апа̄йабхайабхӣто па̄пам̣ на кароти, евам̣ ладжджа̄сабха̄васан̣т̣хита̄ хирӣ, бхайасабха̄васан̣т̣хитам̣ оттаппам̣.

катхам̣ саппатиссавалаккхан̣а̄ хирӣ, ваджджабхӣрукабхайадасса̄вилаккхан̣ам̣ оттаппам̣? екаччо хи джа̄тимахаттапаччавеккхан̣а̄, саттхумахаттапаччавеккхан̣а̄, да̄йаджджамахаттапаччавеккхан̣а̄, сабрахмача̄римахаттапаччавеккхан̣а̄ти евам̣ чатӯхи ка̄ран̣ехи таттха га̄равена саппатиссавалаккхан̣ам̣ хирим̣ самут̣т̣ха̄петва̄ па̄пам̣ на кароти. екаччо атта̄нува̄дабхайам̣, пара̄нува̄дабхайам̣, дан̣д̣абхайам̣, дуггатибхайанти евам̣ чатӯхи ка̄ран̣ехи ваджджато бха̄йанто ваджджабхӣрукабхайадасса̄вилаккхан̣ам̣ оттаппам̣ паччупат̣т̣ха̄петва̄ па̄пакаммам̣ на кароти. еттха ча аджджхаттасамут̣т̣ха̄на̄дита̄ хироттаппа̄нам̣ таттха таттха па̄кат̣абха̄вена вутта̄, на пана несам̣ када̄чи ан̃н̃аман̃н̃авиппайого. на хи ладжджанам̣ ниббхайам̣, па̄пабхайам̣ ва̄ аладжджанам̣ аттхӣти. еваметтха виттха̄рато аттхаван̣н̣ана̄ ведитабба̄.

суккасуттаван̣н̣ана̄ нит̣т̣хита̄.