2. падха̄насуттаван̣н̣ана̄

2. дутийе убхатобйӯл̣хасан̇га̄маппавесанасадисанти йуддхаттха̄йа убхатора̄сикатачатуран̇гинисена̄маджджхаппавесанасадисам̣. да̄нан̃ча йуддхан̃ча сама̄нама̄хӯти еттха катхам̣ панӣдамубхайам̣ сама̄нам̣? джӣвитавина̄сабхӣруко хи йуджджхитум̣ на саккоти, бхогаккхайабхӣруко да̄нам̣ да̄тум̣ на саккоти. ‘‘джӣвитан̃ча раккхисса̄ми, йуджджхисса̄мӣ’’ти хи ваданто на йуджджхати, джӣвите пана а̄лайам̣ виссаджджетва̄ ‘‘хаттхапа̄да̄диччхедо ва̄ хоту маран̣ам̣ ва̄, ган̣хисса̄метам̣ иссарийа’’нти уссахантова йуджджхати. ‘‘бхоге ча раккхисса̄ми, да̄нан̃ча дасса̄мӣ’’ти вадантопи на дада̄ти, бхогесу пана а̄лайам̣ писсаджджетва̄ ‘‘маха̄да̄нам̣ дасса̄мӣ’’ти уссахантова дети. евам̣ да̄нан̃ча йуддхан̃ча самам̣ хоти. кин̃ча бхиййо – аппа̄пи санта̄ бахуке джинанти, йатха̄ ча йуддхе аппака̄пи вӣрапуриса̄ бахуке бхӣрупурисе джинанти, евам̣ саддха̄дисампанно аппакампи да̄нам̣ даданто бахувидхам̣ лобхадосаисса̄маччхарийадит̣т̣хивичикиччха̄дибхедам̣ таппат̣ипаккхам̣ абхибхавати, бахун̃ча да̄навипа̄кам̣ адхигаччхати. евампи да̄нан̃ча йуддхан̃ча сама̄нам̣. тена̄ха ‘‘аппампи че саддаха̄но дада̄ти, тенева со хоти сукхӣ параттха̄’’ти.

ага̄расса хитам̣ касигораккха̄ди ага̄рийам̣, там̣ наттхи еттха̄ти анага̄рийам̣, паббаджджа̄ти а̄ха ‘‘ага̄расса…пе… анага̄рийам̣ паббаджджа’’нти. саббӯпадхипат̣иниссаггаттха̄йа̄ти еттха чатта̄ро упадхӣ – ка̄мупадхи, кхандхупадхи, килесупадхи, абхисан̇кха̄рупадхӣти. ка̄ма̄пи хи ‘‘йам̣ пан̃ча ка̄магун̣е пат̣ичча уппаджджати сукхам̣ соманассам̣, айам̣ ка̄ма̄нам̣ асса̄до’’ти (а. ни. 9.34) евам̣ вуттасса сукхасса, тадасса̄данимиттасса ва̄ дуккхасса адхит̣т̣ха̄набха̄вато упадхӣйати еттха сукханти имина̄ вачанаттхена ‘‘упадхӣ’’ти вуччанти. кхандха̄пи кхандхамӯлакасса дуккхасса адхит̣т̣ха̄набха̄вато, килеса̄пи апа̄йадуккхасса адхит̣т̣ха̄набха̄вато, абхисан̇кха̄ра̄пи бхавадуккхасса адхит̣т̣ха̄набха̄вато ‘‘упадхӣ’’ти вуччанти. саббесам̣ упадхӣнам̣ пат̣иниссагго паха̄нам̣ еттха̄ти саббӯпадхипат̣иниссаггам̣, нибба̄нам̣. тена̄ха ‘‘саббесам̣ кхандхӯпадхи…пе… нибба̄насса аттха̄йа̄’’ти.

падха̄насуттаван̣н̣ана̄ нит̣т̣хита̄.