17. саттарасамо париччхедо

абхин̃н̃а̄рамман̣аниддесаван̣н̣ана̄

1104. ана̄гатам̣сан̃а̄н̣ан̃ча̄ти на а̄гато ана̄гато, на та̄ва сампаттоти аттхо, ана̄гате ам̣са̄ кот̣т̣ха̄са̄ тесам̣ н̃а̄н̣ам̣ ана̄гатам̣сан̃а̄н̣ам̣. йам̣ йам̣ каммам̣ йатха̄каммам̣, там̣ упагаччхати джа̄на̄тӣти йатха̄каммупагам̣, випа̄качетана̄джа̄нанакан̃а̄н̣ам̣.

1107-9. таттха тесу а̄рамман̣аттикесу. читтасаннисситам̣ катва̄ти там̣ ка̄йам̣ читтам̣ саннисситам̣ каритва̄ тамева ка̄йачиттачетасикавасена махаггате читтасмим̣ сама̄ропети н̃а̄н̣ам̣ иддхивидхан̃а̄н̣ам̣, тато ка̄йа̄рамман̣ато ка̄йасса париттатта̄ ка̄ма̄вачаратта̄ паритта̄рамман̣ам̣ н̃а̄н̣ам̣ сийа̄.

1110-3. диссама̄нена ка̄йена, гантука̄мо йада̄ бхаве йо йогӣ диссама̄нена ка̄йена гантука̄мо йада̄ бхавеййа, со йогӣ тада̄ читтам̣ ка̄йасаннисситам̣ катва̄ рӯпака̄йе саннисситам̣ катва̄ там̣ па̄дакаджджха̄начиттам̣ ка̄йавасена ка̄йе а̄ропети, тада̄ джха̄на̄рамман̣ато там̣ н̃а̄н̣ам̣ махаггатагочарам̣ хоти, йам̣ н̃а̄н̣ам̣ йада̄ ана̄гатан̃ча дхаммаджа̄там̣, атӣтан̃ча дхаммаджа̄там̣ висайам̣ а̄рамман̣ам̣ кароти, тада̄ там̣ н̃а̄н̣ам̣ атӣта̄рамман̣ам̣ хоти, тада̄ ана̄гата̄рамман̣ам̣ а̄рамман̣акаран̣ака̄ле ана̄гатагочарам̣ хоти. диссама̄нена ка̄йена тасса бхиккхуно гамане пана сати тасса йогино н̃а̄н̣асса гочаро паччуппанно на̄ма хоти, ити виниддисе.

1114. ка̄йам̣ читтасса васена читте а̄ропети, читтам̣ ка̄йасса васена ка̄йе а̄ропети, ити парин̣а̄манака̄ласмим̣ тасса йогино н̃а̄н̣ам̣ аджджхатта̄рамман̣ам̣ сийа̄. сампаваттати саттасӯти париттамахаггатаатӣтаана̄гатапаччуппаннааджджхаттабахиддха̄рамман̣асан̇кха̄тесу саттасу а̄рамман̣есу сампаваттати.

1120. джа̄нане маджджхима̄нанти махаггата̄нам̣ джа̄нане.

1122. етасса четопарийан̃а̄н̣асса магга̄рамман̣ата̄ парийа̄йена ева мата̄ н̃а̄та̄.

1126-7. таттха тиккхан̣асампаттам̣, паччуппаннам̣ кхан̣а̄дикам̣.

таттха тесу паччуппаннесу йам̣ паччуппаннам̣ кхан̣а̄дикам̣ тиккхан̣асампаттам̣ уппа̄дат̣т̣хитибхан̇гаккхан̣асампаттам̣ кхан̣а̄дикам̣ кхан̣а̄йева там̣ кхан̣а̄вайавам̣ паччуппаннам̣ на̄ма. екадвесантатива̄рапарийа̄паннанти екачиттадвичиттавӣтхива̄рапарийа̄паннам̣ сантатипаччуппаннам̣ на̄ма. паччуппаннанти паччхиманти аддха̄паччуппаннанти аттхо.

1131-2. йена а̄ваджджаначиттена дхамме а̄ваджджати, йена четаса̄ джа̄на̄ти, тесам̣ двиннам̣ а̄ваджджанаджаваначитта̄нам̣ сахат̣т̣ха̄насса абха̄ва̄ там̣ ‘‘кхан̣а̄дикаттайам̣ паччуппанна’’нтиа̄дикам̣ ‘‘екасса читтамекена, авассам̣ пана виджджхати’’ити парийоса̄нам̣ вачанам̣ на йуджджати. а̄ваджджанаджавана̄нам̣ на̄на̄рамман̣абха̄вам̣ паттито а̄паджджанато ча на йуджджати. анит̣т̣хе пана т̣ха̄не тесам̣ а̄ваджджанаджавана̄нам̣ ека̄рамман̣абха̄ве аниччхите тасмим̣ т̣ха̄не на йуджджати, ан̃н̃асмим̣ пана т̣ха̄не маггавӣтхийам̣ а̄ваджджанапарикаммаджавана̄нам̣ касин̣а̄дикам̣ а̄рамман̣ам̣ хоти, готрабхулокуттарачитта̄нан̃ча нибба̄нам̣ а̄рамман̣ам̣ хоти, еттха а̄рамман̣аджавана̄нам̣ ека̄рамман̣ата̄ аниччхата̄.

1134-41. ‘‘екаббхавапариччхиннам̣, паччуппаннанти паччхима’’нти ватва̄ пуна ан̃н̃ена парийа̄йена там̣ паччуппаннам̣ дассетум̣ идам̣ аддха̄кхйам̣ аддха̄на̄ма паччуппаннам̣ джаванава̄рато дӣпетаббам̣. ити вачанам̣ ниддит̣т̣хам̣. йада̄ иддхима̄ йогӣ парасса читтам̣ н̃а̄тум̣ а̄ваджджати, тасса а̄ваджджанамано паччуппаннакхан̣авхайам̣ паччуппаннам̣ манодва̄ра̄ваджджаначиттам̣ а̄рамман̣ам̣ катва̄ тена читтена саддхим̣ нируджджхати, тесу нируддхесу тасса йогино чатта̄ри, пан̃ча ва̄ джавана̄ни джа̄йанти. етесам̣ чатуннам̣, пан̃чаннам̣ джавана̄нам̣ йам̣ паччхимам̣ читтам̣ иддхичиттамудӣритам̣. иддхичиттато сеса̄ни ка̄ма̄вачарачитта̄ни. етесам̣ ка̄ма̄вачаре иддхиджавана̄нам̣ тадева ча парачиттам̣ а̄рамман̣ам̣ хоти йасма̄, тасма̄ сабба̄ни та̄ни джавана̄ни ека̄рамман̣атам̣ йанти, тесам̣ джавана̄нам̣ на̄на̄рамман̣ата̄ аддха̄васа̄ на бхавеййа, паччуппанна̄рамман̣ато тесам̣ джавана̄нам̣ ека̄рамман̣абха̄вепи иддхима̄насамева ча парасса читтам̣ джа̄на̄ти. итара̄ни ка̄ма̄вачара̄ни пана читта̄ни парасса читтам̣ на джа̄нанти. йатха̄ чаккхудва̄ре ту вин̃н̃а̄н̣анти чаккхувин̃н̃а̄н̣ам̣ рӯпам̣ пассати, татха̄ итарам̣ читтам̣ на пассати.

1161. ана̄гатам̣сан̃а̄н̣асса̄ти ана̄гатам̣сан̃а̄н̣асса ана̄гатам̣ дхаммам̣ агочарам̣, гочарам̣ на хотийева̄ти аттхо.

1169. вивидхаттха̄ни ван̣н̣апада̄ни йасмим̣ со вивидхаттхаван̣н̣ападо, там̣ мадхураттхаматинӣхарам̣ уттамам̣ сотуджанасса хадайам̣ пӣтикарам̣ сачетано ко на̄ма мануджо на сун̣еййа.

ити абхидхамма̄вата̄рат̣ӣка̄йа

абхин̃н̃а̄рамман̣аниддесаван̣н̣ана̄ нит̣т̣хита̄.

саттарасамо париччхедо.