16. сол̣асамо париччхедо

абхин̃н̃а̄ниддесаван̣н̣ана̄

1045. сата̄ти сатисампаннена. ануйоганти вӣрийам̣.

1047. йога̄вачарабхиккхуна̄ ниббаттита̄су абхин̃н̃а̄су асса йога̄вачарасса бхиккхуно сама̄дхибха̄вана̄ нит̣т̣хам̣ парийоса̄нам̣ гата̄ сийа̄.

1050. дантети данте т̣хите. ачалети ачале т̣хите.

1052-4. абхин̃н̃а̄йа па̄дакам̣ ка̄ран̣ам̣ абхин̃н̃а̄па̄дакам̣ йогӣ сатам̣ ва̄пи сахассам̣ ва̄пи йади саче иччхати, абхин̃н̃а̄па̄дакам̣ джха̄нам̣ сама̄паджджитва̄ тато абхин̃н̃а̄па̄дакаджха̄нато вут̣т̣ха̄йа вут̣т̣хахитва̄ ‘‘сатам̣ хоми, сатам̣ хоми’’ ити евам̣ ка̄ма̄вачарапарикаммама̄насам̣ катва̄ абхин̃н̃а̄йа па̄дакам̣ ка̄ран̣абхӯтам̣ джха̄нам̣ пуна̄дхит̣т̣ха̄ти пуна а̄паджджитва̄ тато джха̄нато вут̣т̣ха̄йа пуна адхит̣т̣ха̄ти, саха̄дхит̣т̣ха̄нена четаса̄ адхит̣т̣ха̄насан̇кха̄тена чатуттхаджджха̄начиттена саха со йогӣ сатам̣ хоти. иддхивидхан̃а̄н̣ам̣.

1067-8. есо адхигата̄бхин̃н̃о йогӣ па̄дака̄рамман̣ена чатуттхаджджха̄насса пат̣ибха̄ганимиттасан̇кха̄тена а̄рамман̣ена пхут̣т̣хе ока̄се гате паватте пана садде сун̣а̄ти. диббасотан̃а̄н̣ам̣.

1069. парасса читтам̣ парийати париччхиджджатӣти четопарийам̣, тамева ма̄насам̣ четопарийама̄насам̣.

1070. хадайам̣ пана нисса̄йа̄ти хадайаваттхум̣ нисса̄йа паваттама̄налохитам̣, хадайакосе паваттам̣ рухиранти аттхо.

1075. ка̄ма̄вачарачиттан̃ча̄ти ка̄ма̄вачарасатта̄нам̣ ка̄ма̄вачарачиттан̃ча. рӯпа̄рӯпесу рӯпабхава̄рӯпабхавесу сатта̄нам̣ ма̄насан̃ча. ким̣ бхӯтам̣? сара̄га̄диппабхедакам̣ ма̄насам̣ саббам̣ четопарийан̃а̄н̣ам̣ джа̄на̄ти. четопарийан̃а̄н̣ам̣.

1077-82. нисаджджа̄ саббапаччхима̄ти саббесам̣ ирийа̄патха̄нам̣ паччха̄ джа̄та̄ нисаджджа̄ бхиккхуна̄ а̄ваджджитабба̄. тато пабхути тато саббапаччхимато нисаджджа̄то пабхути там̣ саббам̣ паччхиманисаджджам̣ а̄дим̣ катва̄ пат̣иломаккама̄ пат̣иломаккамена саббам̣ аттана̄ катам̣ а̄ваджджитаббам̣. асмим̣ бхаве йа̄ва йаттакам̣ ка̄лам̣ сандхи пат̣исандхи хоти, та̄ва таттакам̣ ка̄лам̣ катам̣ кирийам̣ тена бхиккхуна̄ а̄ваджджитаббам̣. пуримасмим̣ бхавепи чутиккхан̣епи ниббаттам̣ на̄марӯпан̃ча са̄дхукам̣ а̄ваджджитаббам̣. чутиккхан̣е ниббатте тасмим̣ на̄марӯпе евам̣ бхиккхуна̄ а̄ваджджитаббе йада̄ тадева тамева на̄марӯпам̣ а̄рамман̣ам̣ катва̄ чутиккхан̣е манодва̄ре манакка̄ро манодва̄ра̄ваджджаначиттам̣ уппаджджати. пуббенива̄са̄нуссатин̃а̄н̣ам̣.

1086-96. абхин̃н̃а̄па̄дакам̣ касин̣а̄рамман̣ам̣ джха̄нам̣ абхинӣха̄раккхамам̣ катва̄ имесу тӣсу касин̣есу катапун̃н̃ехи. тасма̄ тамитарам̣ ва̄пӣти а̄локакасин̣ам̣ ва̄ итарам̣ ва̄пи касин̣адвайам̣ йатха̄ккамам̣ уппа̄детва̄ упача̄рабхӯмийам̣йева т̣хатва̄ там̣ а̄локакасин̣ам̣ т̣хапетаббам̣. аппанам̣ пан̣д̣ито на уппа̄деййа, саче уппа̄дети, там̣ а̄локакасин̣ам̣ па̄дакаджджха̄нанисситам̣ па̄дакаджджха̄насса а̄рамман̣ам̣ хоти. вад̣д̣хитасса джха̄насса антогадхам̣ рӯпам̣ тена йогина̄ пасситаббам̣ бхаве бхавеййа. там̣ рӯпам̣ пассато пассантасса тасса йогино парикаммасса ва̄ро атиккамати, та̄ваде тасмим̣йева кхан̣е а̄локопи тасса йогино а̄локопи кхиппам̣ антарадха̄йати. тасмим̣ а̄локе антарахите рӯпагатам̣ рӯпам̣ на диссати. дивасампи нисӣдитва̄ пассато рӯпадассанам̣ хоти.

1100-1. там̣читтасам̣йутанти тена чатуттхаджджха̄нена йуттам̣ читтам̣. ана̄гатам̣сан̃а̄н̣асса парикаммам̣, йатха̄каммӯпагасса н̃а̄н̣асса ча парикаммам̣. диббачаккхун̃а̄н̣ам̣.

1103. йо бхиккху идха имасмим̣ са̄сане имам̣ пана гантхам̣ сун̣а̄ти, читте кароти ча, со бхиккху анена тарена имина̄ гантхена таритва̄ абхидхаммамахан̣н̣авапа̄рам̣ йа̄ти па̄пун̣а̄ти, джа̄на̄тӣти аттхо.

ити абхидхамма̄вата̄рат̣ӣка̄йа

абхин̃н̃а̄ниддесаван̣н̣ана̄ нит̣т̣хита̄.

сол̣асамо париччхедо.