13. терасамо париччхедо

ка̄ракапат̣иведхаван̣н̣ана̄

ведакасса̄ти сукхадуккхаведакасса. тада̄йаттавуттӣнанти тесам̣ а̄йатта̄ пат̣ибаддха̄ йесам̣ випа̄ка̄нам̣ те тада̄йаттавуттино, тесам̣. атра имасмим̣ т̣ха̄не а̄чарийена париха̄ро вуччате. кутойам̣ тава таттха̄нуродхоти таттха тасмим̣ ан̃н̃асса аттака̄ракасса абха̄вепи саттусан̇кха̄тасса аттано бха̄вепи айам̣ тава ануродхо анунайо куто кена ка̄ран̣ена идха имасмим̣ асати каттари кусала̄дӣнам̣ аттхибха̄ве каммавиродхо куто кена ка̄ран̣ена. атха̄пӣти апаро найопи. кин̃четтха̄ти еттха етиссам̣ чодана̄йам̣ кин̃чи ваттаббам̣ аттхи, авасит̣т̣хам̣ та̄ва брӯхи, апарисаматта̄ те чодана̄. тасса̄ти аттано. ка̄ракаведакатта̄бха̄воти ка̄ракаведакаттасса абха̄во сийа̄.

атха на бхаватӣти аттано ана̄се четана̄пи ана̄со йади на бхавати. пат̣ин̃н̃а̄ хӣна̄ти ‘‘четана̄йа анан̃н̃о атта̄’’ти пат̣ин̃н̃а̄ хӣна̄. вуттаппака̄ратоти ‘‘аттано ана̄се четана̄йа на̄со на бхавати’’ити вуттаппака̄рато. випарӣтанти ‘‘аттано ана̄се четана̄йа ана̄со’’ити випарӣтаггахан̣ам̣ сийа̄. атта̄ нассату, четана̄ тит̣т̣хату, атха пана евам̣ на бхаватӣти атта̄ нассату, четана̄ тит̣т̣хату, евам̣ гахан̣ам̣ пана на бхавати. анан̃н̃аттапаккхам̣ париччаджа париччаджа̄хи ‘‘четана̄йа анан̃н̃о атта̄’’ти. пат̣ин̃н̃а̄ хӣна̄ йасса со пат̣ин̃н̃а̄хӣно.

убхиннам̣ четанатта̄нам̣ екадесата̄ екадесабха̄во наттхи. еван̃ча сатӣти евам̣ убхиннам̣ екадесасса абха̄ве сати ко досо ити твам̣ че вадеййа̄си. йам̣ пана тайа̄ вуттам̣ йатха̄ рӯпарасагандха̄дӣнам̣ екадесе ваттама̄на̄нампи лаккхан̣ато ан̃н̃аттанти йам̣ вачанам̣ пана тайа̄ вуттам̣, там̣ вачанам̣ айуттам̣, на̄нурӯпанти аттхо. тава пат̣ин̃н̃а̄ хӣна̄ти ‘‘екадесе ваттама̄на̄нам̣ четанатта̄нам̣ лаккхан̣ато ан̃н̃атта’’нти пат̣ин̃н̃а̄ хӣна̄.

еван̃ча сатӣти етам̣ четана̄йа ан̃н̃абха̄ве сати ко досо ити че бхавам̣ вадеййа. ‘‘ачетано атта̄’’ти вачанам̣, пуббе вуттадосатоти ‘‘па̄ка̄ратарупа̄са̄н̣атин̣асадисо сийа̄’’ти пуббе вуттадосато.

780. аттхи саттопапа̄тикоти опапа̄тика̄ сатта̄ аттхи.

781. бха̄ра̄да̄нанти бха̄раггахан̣ам̣. бха̄раниккхепананти бха̄роропанам̣.

783. екасса пуггаласса ат̣т̣хисан̃чайо ат̣т̣хисамӯхо екена каппена паббатасамо ра̄си сийа̄.

785. бхо ма̄ра, твам̣ сатто ити паччеси, кам̣ саддахаси, ‘‘сатто’’ти гахан̣ам̣ те тава дит̣т̣хигатам̣, суддхасан̇кха̄рапун̃джо айам̣, идха локе сатто на упалаббхати.

787. йо бхиккху имам̣ гантхам̣ аччантам̣ сататампи чинтети, тасса бхиккхуно парама̄ пан̃н̃а̄ вепулам̣ випулабха̄вам̣ гаччхати.

788. йо бхиккху имам̣ абхидхамма̄вата̄рам̣ атиматикарам̣ уттамам̣ абхин̃н̃а̄н̣акарам̣ вимативина̄сакарам̣ кан̇кхаччхедакарам̣ пийаккарам̣ пемакарам̣ сада̄ пат̣хати, сун̣а̄ти, тасса бхиккхуно мати идха са̄сане т̣хите викасати пат̣ипхуллати.

ити абхидхамма̄вата̄рат̣ӣка̄йа

ка̄ракапат̣иведхаван̣н̣ана̄ нит̣т̣хита̄.

терасамо париччхедо.