1. маггасуттам̣

833. са̄ваттхинида̄нам̣. ‘‘пуббева ме, бхиккхаве, самбодха̄ анабхисамбуддхасса бодхисаттассева сато етадахоси – ‘ко ну кхо магго, ка̄ пат̣ипада̄ иддхипа̄дабха̄вана̄йа̄’ти? тасса майхам̣, бхиккхаве, етадахоси – ‘идха бхиккху чхандасама̄дхиппадха̄насан̇кха̄расаманна̄гатам̣ иддхипа̄дам̣ бха̄вети – ити ме чхандо на ча атилӣно бхависсати, на ча атиппаггахито бхависсати, на ча аджджхаттам̣ сам̣кхитто бхависсати, на ча бахиддха̄ виккхитто бхависсати. паччха̄пуресан̃н̃ӣ ча вихарати – йатха̄ пуре татха̄ паччха̄, йатха̄ паччха̄ татха̄ пуре; йатха̄ адхо татха̄ уддхам̣, йатха̄ уддхам̣ татха̄ адхо; йатха̄ дива̄ татха̄ раттим̣, йатха̄ раттим̣ татха̄ дива̄. ити виват̣ена четаса̄ апарийонаддхена саппабха̄сам̣ читтам̣ бха̄вети. вӣрийасама̄дхи…пе… читтасама̄дхи…пе… вӣмам̣са̄сама̄дхиппадха̄насан̇кха̄расаманна̄гатам̣ иддхипа̄дам̣ бха̄вети – ити ме вӣмам̣са̄ на ча атилӣна̄ бхависсати, на ча атиппаггахита̄ бхависсати, на ча аджджхаттам̣ сам̣кхитта̄ бхависсати, на ча бахиддха̄ виккхитта̄ бхависсати. паччха̄пуресан̃н̃ӣ ча вихарати – йатха̄ пуре татха̄ паччха̄, йатха̄ паччха̄ татха̄ пуре; йатха̄ адхо татха̄ уддхам̣, йатха̄ уддхам̣ татха̄ адхо; йатха̄ дива̄ татха̄ раттим̣ йатха̄ раттим̣ татха̄ дива̄’ – ити виват̣ена четаса̄ апарийонаддхена саппабха̄сам̣ читтам̣ бха̄вети.

‘‘евам̣ бха̄витесу кхо, бхиккхаве, бхиккху чатӯсу иддхипа̄десу евам̣ бахулӣкатесу анекавихитам̣ иддхивидхам̣ паччанубхоти – екопи хутва̄ бахудха̄ хоти, бахудха̄пи хутва̄ еко хоти…пе… йа̄ва брахмалока̄пи ка̄йена васам̣ ваттети. евам̣ бха̄витесу кхо, бхиккхаве, бхиккху чатӯсу иддхипа̄десу евам̣ бахулӣкатесу, а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихаратӣ’’ти. пат̣хамам̣.

(чхапи абхин̃н̃а̄йо виттха̄ретабба̄).