7. сахампатибрахмасуттам̣

527. екам̣ самайам̣ бхагава̄ урувела̄йам̣ вихарати наджджа̄ неран̃джара̄йа тӣре аджапа̄ланигродхе пат̣хама̄бхисамбуддхо. атха кхо бхагавато рахогатасса пат̣исаллӣнасса евам̣ четасо паривитакко удапа̄ди – ‘‘пан̃чиндрийа̄ни бха̄вита̄ни бахулӣката̄ни аматогадха̄ни хонти аматапара̄йан̣а̄ни аматапарийоса̄на̄ни. катама̄ни пан̃ча? саддхиндрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. вӣрийиндрийам̣…пе… сатиндрийам̣…пе… сама̄дхиндрийам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. има̄ни пан̃чиндрийа̄ни бха̄вита̄ни бахулӣката̄ни аматогадха̄ни хонти аматапара̄йан̣а̄ни аматапарийоса̄на̄нӣ’’ти.

атха кхо брахма̄ сахампати бхагавато четаса̄ четопаривитаккаман̃н̃а̄йа – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа; евамева брахмалоке антарахито бхагавато пурато па̄турахоси. атха кхо брахма̄ сахампати екам̣сам̣ уттара̄сан̇гам̣ каритва̄ йена бхагава̄ тенан̃джалим̣ пан̣а̄метва̄ бхагавантам̣ етадавоча – ‘‘еваметам̣, бхагава̄, еваметам̣ сугата! пан̃чиндрийа̄ни бха̄вита̄ни бахулӣката̄ни аматогадха̄ни хонти аматапара̄йан̣а̄ни аматапарийоса̄на̄ни. катама̄ни пан̃ча? саддхиндрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣…пе… пан̃н̃индрийам̣ бха̄витам̣ бахулӣкатам̣ аматогадхам̣ хоти аматапара̄йан̣ам̣ аматапарийоса̄нам̣. има̄ни пан̃чиндрийа̄ни бха̄вита̄ни бахулӣката̄ни аматогадха̄ни хонти аматапара̄йан̣а̄ни аматапарийоса̄на̄ни’’.

‘‘бхӯтапубба̄хам̣, бханте, кассапе самма̄самбуддхе брахмачарийам̣ ачарим̣. татрапи мам̣ евам̣ джа̄нанти – ‘сахако бхиккху, сахако бхиккхӯ’ти. со кхва̄хам̣, бханте, имесам̣йева пан̃чаннам̣ индрийа̄нам̣ бха̄витатта̄ бахулӣкататта̄ ка̄месу ка̄маччхандам̣ вира̄джетва̄ ка̄йасса бхеда̄ парам̣ маран̣а̄ сугатим̣ брахмалокам̣ упапанно. татрапи мам̣ евам̣ джа̄нанти – ‘брахма̄ сахампати, брахма̄ сахампатӣ’’’ти. ‘‘еваметам̣, бхагава̄, еваметам̣ сугата! ахаметам̣ джа̄на̄ми, ахаметам̣ пасса̄ми йатха̄ има̄ни пан̃чиндрийа̄ни бха̄вита̄ни бахулӣката̄ни аматогадха̄ни хонти аматапара̄йан̣а̄ни аматапарийоса̄на̄нӣ’’ти. саттамам̣.