1. джара̄дхаммасуттам̣

511. евам̣ ме сутам̣ – екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена бхагава̄ са̄йанхасамайам̣ пат̣исалла̄на̄ вут̣т̣хито паччха̄тапе нисинно хоти пит̣т̣хим̣ ота̄пайама̄но.

атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ бхагавато гатта̄ни па̄н̣ина̄ аномаджджанто бхагавантам̣ етадавоча – ‘‘аччхарийам̣, бханте, аббхутам̣, бханте! на чевам̣ да̄ни, бханте, бхагавато та̄ва парисуддхо чхавиван̣н̣о парийода̄то, ситхила̄ни ча гатта̄ни сабба̄ни валийаджа̄та̄ни, пурато паббха̄ро ча ка̄йо, диссати ча индрийа̄нам̣ ан̃н̃атхаттам̣ – чаккхундрийасса сотиндрийасса гха̄ниндрийасса дживхиндрийасса ка̄йиндрийасса̄’’ти.

‘‘еван̃хетам̣, а̄нанда, хоти – джара̄дхаммо йоббан̃н̃е, бйа̄дхидхаммо а̄рогйе, маран̣адхаммо джӣвите. на чева та̄ва парисуддхо хоти чхавиван̣н̣о парийода̄то, ситхила̄ни ча хонти гатта̄ни сабба̄ни валийаджа̄та̄ни, пурато паббха̄ро ча ка̄йо, диссати ча индрийа̄нам̣ ан̃н̃атхаттам̣ – чаккхундрийасса сотиндрийасса гха̄ниндрийасса дживхиндрийасса ка̄йиндрийасса̄’’ти.

‘‘идамавоча бхагава̄. идам̣ ватва̄ ча сугато атха̄парам̣ етадавоча саттха̄ –

‘‘дхӣ там̣ джамми джаре аттху, дуббан̣н̣акаран̣ӣ джаре;

та̄ва манорамам̣ бимбам̣, джара̄йа абхимаддитам̣.

‘‘йопи вассасатам̣ джӣве, сопи маччупара̄йан̣о [саббе маччупара̄йана̄ (сйа̄. кам̣. ка.)];

на кин̃чи париваджджети, саббамева̄бхимаддатӣ’’ти. пат̣хамам̣;