7. дуччаритасуттам̣

413. атха кхо ан̃н̃атаро бхиккху йена бхагава̄ тенупасан̇ками…пе… ‘‘са̄дху ме, бханте, бхагава̄ сам̣кхиттена дхаммам̣ десету, йамахам̣ бхагавато дхаммам̣ сутва̄ еко вӯпакат̣т̣хо аппаматто а̄та̄пӣ пахитатто вихареййа’’нти. ‘‘тасма̄тиха твам̣, бхиккху, а̄димева висодхехи кусалесу дхаммесу. ко ча̄ди кусала̄нам̣ дхамма̄нам̣? идха твам̣, бхиккху, ка̄йадуччаритам̣ паха̄йа ка̄йасучаритам̣ бха̄вессаси. вачӣдуччаритам̣ паха̄йа вачӣсучаритам̣ бха̄вессаси. манодуччаритам̣ паха̄йа маносучаритам̣ бха̄вессаси. йато кхо твам̣, бхиккху, ка̄йадуччаритам̣ паха̄йа ка̄йасучаритам̣ бха̄вессаси, вачӣдуччаритам̣ паха̄йа вачӣсучаритам̣ бха̄вессаси, манодуччаритам̣ паха̄йа маносучаритам̣ бха̄вессаси, тато твам̣, бхиккху, сӣлам̣ нисса̄йа сӣле патит̣т̣ха̄йа чатта̄ро сатипат̣т̣ха̄не бха̄веййа̄си’’.

‘‘катаме чатта̄ро? идха твам̣, бхиккху, ка̄йе ка̄йа̄нупассӣ вихара̄хи а̄та̄пӣ сампаджа̄но сатима̄, винеййа локе абхиджджха̄доманассам̣; ведана̄су…пе… читте…пе… дхаммесу дхамма̄нупассӣ вихара̄хи а̄та̄пӣ сампаджа̄но сатима̄, винеййа локе абхиджджха̄доманассам̣. йато кхо твам̣, бхиккху, сӣлам̣ нисса̄йа сӣле патит̣т̣ха̄йа име чатта̄ро сатипат̣т̣ха̄не евам̣ бха̄вессаси, тато туйхам̣, бхиккху, йа̄ ратти ва̄ дивасо ва̄ а̄гамиссати вуддхийева па̄т̣икан̇кха̄ кусалесу дхаммесу, но париха̄нӣ’’ти…пе… ан̃н̃атаро ча пана со бхиккху арахатам̣ ахосӣти. саттамам̣.