2. чират̣т̣хитисуттам̣

388. там̣йева нида̄нам̣. екамантам̣ нисинно кхо а̄йасма̄ бхаддо а̄йасмантам̣ а̄нандам̣ етадавоча – ‘‘ко ну кхо, а̄вусо а̄нанда, хету, ко паччайо йена татха̄гате париниббуте саддхаммо на чират̣т̣хитико хоти? ко пана̄вусо а̄нанда, хету, ко паччайо йена татха̄гате париниббуте саддхаммо чират̣т̣хитико хотӣ’’ти?

‘‘са̄дху са̄дху, а̄вусо бхадда! бхаддако кхо те, а̄вусо бхадда, умман̇го, бхаддакам̣ пат̣ибха̄нам̣, калйа̄н̣ӣ парипуччха̄. еван̃хи твам̣, а̄вусо бхадда, пуччхаси – ‘ко ну кхо, а̄вусо а̄нанда, хету, ко паччайо йена татха̄гате париниббуте саддхаммо на чират̣т̣хитико хоти? ко пана̄вусо а̄нанда, хету, ко паччайо йена татха̄гате париниббуте саддхаммо чират̣т̣хитико хотӣ’’’ти? ‘‘евама̄вусо’’ти. ‘‘чатуннам̣ кхо, а̄вусо, сатипат̣т̣ха̄на̄нам̣ абха̄витатта̄ абахулӣкататта̄ татха̄гате париниббуте саддхаммо на чират̣т̣хитико хоти. чатуннан̃ча кхо, а̄вусо, сатипат̣т̣ха̄на̄нам̣ бха̄витатта̄ бахулӣкататта̄ татха̄гате париниббуте саддхаммо чират̣т̣хитико хоти’’.

‘‘катамесам̣ чатуннам̣? идха̄вусо, бхиккху ка̄йе ка̄йа̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣; ведана̄су…пе… читте…пе… дхаммесу дхамма̄нупассӣ вихарати а̄та̄пӣ сампаджа̄но сатима̄, винеййа локе абхиджджха̄доманассам̣. имесам̣ кхо, а̄вусо, чатуннам̣ сатипат̣т̣ха̄на̄нам̣ абха̄витатта̄ абахулӣкататта̄ татха̄гате париниббуте саддхаммо на чират̣т̣хитико хоти. имесан̃ча кхо, а̄вусо, чатуннам̣ сатипат̣т̣ха̄на̄нам̣ бха̄витатта̄ бахулӣкататта̄ татха̄гате париниббуте саддхаммо чират̣т̣хитико хотӣ’’ти. дутийам̣.