9. седакасуттам̣

385. екам̣ самайам̣ бхагава̄ сумбхесу вихарати седакам̣ на̄ма сумбха̄нам̣ нигамо. татра кхо бхагава̄ бхиккхӯ а̄мантеси – ‘‘бхӯтапуббам̣, бхиккхаве, чан̣д̣а̄лавам̣сико чан̣д̣а̄лавам̣сам̣ усса̄петва̄ медакатха̄ликам̣ антева̄сим̣ а̄мантеси – ‘ехи твам̣, самма медакатха̄лике, чан̣д̣а̄лавам̣сам̣ абхирухитва̄ мама упарикхандхе тит̣т̣ха̄хӣ’ти. ‘евам̣, а̄чарийа̄’ти кхо, бхиккхаве, медакатха̄лика̄ антева̄сӣ чан̣д̣а̄лавам̣сикасса пат̣иссутва̄ чан̣д̣а̄лавам̣сам̣ абхирухитва̄ а̄чарийасса упарикхандхе ат̣т̣ха̄си. атха кхо, бхиккхаве, чан̣д̣а̄лавам̣сико медакатха̄ликам̣ антева̄сим̣ етадавоча – ‘твам̣, самма медакатха̄лике, мамам̣ раккха, ахам̣ там̣ раккхисса̄ми. евам̣ майам̣ ан̃н̃аман̃н̃ам̣ гутта̄ ан̃н̃аман̃н̃ам̣ раккхита̄ сиппа̄ни чева дассесса̄ма, ла̄бхан̃ча [ла̄бхе ча (сӣ.)] лаччха̄ма, соттхина̄ ча чан̣д̣а̄лавам̣са̄ орохисса̄ма̄’ти. евам̣ вутте, бхиккхаве, медакатха̄лика̄ антева̄сӣ чан̣д̣а̄лавам̣сикам̣ етадавоча – ‘на кхо панетам̣, а̄чарийа, евам̣ бхависсати. твам̣, а̄чарийа, атта̄нам̣ раккха, ахам̣ атта̄нам̣ раккхисса̄ми. евам̣ майам̣ аттагутта̄ аттараккхита̄ сиппа̄ни чева дассесса̄ма, ла̄бхан̃ча лаччха̄ма, соттхина̄ ча чан̣д̣а̄лавам̣са̄ орохисса̄ма̄’’’ти. ‘‘со таттха н̃а̄йо’’ти бхагава̄ етадавоча, ‘‘йатха̄ медакатха̄лика̄ антева̄сӣ а̄чарийам̣ авоча. атта̄нам̣, бхиккхаве, раккхисса̄мӣти сатипат̣т̣ха̄нам̣ севитаббам̣; парам̣ раккхисса̄мӣти сатипат̣т̣ха̄нам̣ севитаббам̣. атта̄нам̣, бхиккхаве, раккханто парам̣ раккхати, парам̣ раккханто атта̄нам̣ раккхати’’.

‘‘катхан̃ча, бхиккхаве, атта̄нам̣ раккханто парам̣ раккхати? а̄севана̄йа, бха̄вана̄йа, бахулӣкаммена – евам̣ кхо, бхиккхаве, атта̄нам̣ раккханто парам̣ раккхати. катхан̃ча, бхиккхаве, парам̣ раккханто атта̄нам̣ раккхати? кхантийа̄, авихим̣са̄йа, меттачиттата̄йа, анудайата̄йа – евам̣ кхо, бхиккхаве, парам̣ раккханто атта̄нам̣ раккхати. атта̄нам̣, бхиккхаве, раккхисса̄мӣти сатипат̣т̣ха̄нам̣ севитаббам̣; парам̣ раккхисса̄мӣти сатипат̣т̣ха̄нам̣ севитаббам̣. атта̄нам̣, бхиккхаве, раккханто парам̣ раккхати, парам̣ раккханто атта̄нам̣ раккхатӣ’’ти. навамам̣.