6. абхайасуттам̣

237. евам̣ ме сутам̣ – екам̣ самайам̣ бхагава̄ ра̄джагахе вихарати гиджджхакӯт̣е паббате. атха кхо абхайо ра̄джакума̄ро йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо абхайо ра̄джакума̄ро бхагавантам̣ етадавоча – ‘‘пӯран̣о, бханте, кассапо евама̄ха – ‘наттхи хету, наттхи паччайо ан̃н̃а̄н̣а̄йа адассана̄йа. ахету, аппаччайо [аппаччайа̄ (сӣ.), аппаччайам̣ (?)] ан̃н̃а̄н̣ам̣ адассанам̣ хоти. наттхи хету, наттхи паччайо н̃а̄н̣а̄йа дассана̄йа. ахету, аппаччайо н̃а̄н̣ам̣ дассанам̣ хотӣ’ти. идха бхагава̄ кима̄ха̄’’ти? ‘‘аттхи, ра̄джакума̄ра, хету, аттхи паччайо ан̃н̃а̄н̣а̄йа адассана̄йа. сахету, саппаччайо [саппаччайа̄ (сӣ.), саппаччайам̣ (?)] ан̃н̃а̄н̣ам̣ адассанам̣ хоти. аттхи, ра̄джакума̄ра, хету, аттхи паччайо н̃а̄н̣а̄йа дассана̄йа. сахету, саппаччайо н̃а̄н̣ам̣ дассанам̣ хотӣ’’ти.

‘‘катамо пана, бханте, хету, катамо паччайо ан̃н̃а̄н̣а̄йа адассана̄йа? катхам̣ сахету, саппаччайо ан̃н̃а̄н̣ам̣ адассанам̣ хотӣ’’ти? ‘‘йасмим̣ кхо, ра̄джакума̄ра, самайе ка̄мара̄гапарийут̣т̣хитена четаса̄ вихарати ка̄мара̄гапаретена, уппаннасса ча ка̄мара̄гасса ниссаран̣ам̣ йатха̄бхӯтам̣ на джа̄на̄ти на пассати – айампи кхо, ра̄джакума̄ра, хету, айам̣ паччайо ан̃н̃а̄н̣а̄йа адассана̄йа. евампи сахету саппаччайо ан̃н̃а̄н̣ам̣ адассанам̣ хоти.

‘‘пуна чапарам̣, ра̄джакума̄ра, йасмим̣ самайе бйа̄па̄дапарийут̣т̣хитена четаса̄ вихарати бйа̄па̄дапаретена…пе… тхинамиддхапарийут̣т̣хитена… уддхаччакуккуччапарийут̣т̣хитена… вичикиччха̄парийут̣т̣хитена четаса̄ вихарати вичикиччха̄паретена, уппанна̄йа ча вичикиччха̄йа ниссаран̣ам̣ йатха̄бхӯтам̣ на джа̄на̄ти на пассати – айампи кхо, ра̄джакума̄ра, хету, айам̣ паччайо ан̃н̃а̄н̣а̄йа адассана̄йа. евампи сахету саппаччайо ан̃н̃а̄н̣ам̣ адассанам̣ хотӣ’’ти.

‘‘ко на̄ма̄йам̣, бханте, дхаммапарийа̄йо’’ти? ‘‘нӣваран̣а̄ на̄мете, ра̄джакума̄ра̄’’ти. ‘‘таггха, бхагава̄, нӣваран̣а̄; таггха, сугата, нӣваран̣а̄! екамекенапи кхо, бханте, нӣваран̣ена абхибхӯто йатха̄бхӯтам̣ на джа̄неййа на пассеййа, ко пана ва̄до пан̃чахи нӣваран̣ехи?

‘‘катамо пана, бханте, хету, катамо паччайо н̃а̄н̣а̄йа дассана̄йа? катхам̣ сахету, саппаччайо н̃а̄н̣ам̣ дассанам̣ хотӣ’’ти? ‘‘идха, ра̄джакума̄ра, бхиккху сатисамбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. со сатисамбоджджхан̇гам̣ бха̄витена читтена йатха̄бхӯтам̣ джа̄на̄ти пассати – айампи кхо, ра̄джакума̄ра, хету, айам̣ паччайо н̃а̄н̣а̄йа дассана̄йа. евампи сахету, саппаччайо н̃а̄н̣ам̣ дассанам̣ хоти.

‘‘пуна чапарам̣, ра̄джакума̄ра, бхиккху…пе… упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. со упеккха̄самбоджджхан̇гам̣ бха̄витена читтена йатха̄бхӯтам̣ джа̄на̄ти пассати – айампи кхо, ра̄джакума̄ра, хету, айам̣ паччайо н̃а̄н̣а̄йа дассана̄йа. евам̣ сахету, саппаччайо н̃а̄н̣ам̣ дассанам̣ хотӣ’’ти.

‘‘ко на̄ма̄йам̣, бханте, дхаммапарийа̄йо’’ти? ‘‘боджджхан̇га̄ на̄мете, ра̄джакума̄ра̄’’ти. ‘‘таггха, бхагава̄, боджджхан̇га̄; таггха, сугата, боджджхан̇га̄! екамекенапи кхо, бханте, боджджхан̇гена саманна̄гато йатха̄бхӯтам̣ джа̄неййа пассеййа, ко пана ва̄до саттахи боджджхан̇гехи? йопи ме, бханте, гиджджхакӯт̣ам̣ паббатам̣ а̄рохантасса ка̄йакиламатхо читтакиламатхо, сопи ме пат̣иппассаддхо, дхаммо ча ме абхисамито’’ти. чхат̣т̣хам̣.

са̄каччхавагго чхат̣т̣хо.

тассудда̄нам̣ –

а̄ха̄ра̄ парийа̄йамагги, меттам̣ сан̇га̄равена ча;

абхайо пуччхито пан̃хам̣, гиджджхакӯт̣амхи паббатети.