9. екадхаммасуттам̣

210. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми, йо евам̣ бха̄вито бахулӣкато сам̣йоджанӣйа̄нам̣ дхамма̄нам̣ паха̄на̄йа сам̣ваттати, йатхайидам̣, бхиккхаве, сатта боджджхан̇га̄. катаме сатта? сатисамбоджджхан̇го…пе… упеккха̄самбоджджхан̇го. катхам̣ бха̄вита̄ ча, бхиккхаве, сатта боджджхан̇га̄ катхам̣ бахулӣката̄ сам̣йоджанӣйа̄нам̣ дхамма̄нам̣ паха̄на̄йа сам̣ваттанти?

‘‘идха, бхиккхаве, бхиккху сатисамбоджджхан̇гам̣ бха̄вети вивеканисситам̣…пе… упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. евам̣ бха̄вита̄ кхо, бхиккхаве, сатта боджджхан̇га̄ евам̣ бахулӣката̄ сам̣йоджанӣйа̄нам̣ дхамма̄нам̣ паха̄на̄йа сам̣ваттанти.

‘‘катаме ча, бхиккхаве, сам̣йоджанӣйа̄ дхамма̄? чаккху, бхиккхаве, сам̣йоджанӣйо дхаммо. еттхете уппаджджанти сам̣йоджанавинибандха̄ аджджхоса̄на̄…пе… дживха̄ сам̣йоджанӣйа̄ дхамма̄. еттхете уппаджджанти сам̣йоджанавинибандха̄ аджджхоса̄на̄…пе… мано сам̣йоджанӣйо дхаммо. еттхете уппаджджанти сам̣йоджанавинибандха̄ аджджхоса̄на̄. име вуччанти, бхиккхаве, сам̣йоджанӣйа̄ дхамма̄’’ти. навамам̣.