6. тан̣хаккхайасуттам̣

207. ‘‘йо, бхиккхаве, магго йа̄ пат̣ипада̄ тан̣хаккхайа̄йа сам̣ваттати, там̣ маггам̣ там̣ пат̣ипадам̣ бха̄ветха. катамо ча, бхиккхаве, магго катама̄ ча пат̣ипада̄ тан̣хаккхайа̄йа сам̣ваттати? йадидам̣ – сатта боджджхан̇га̄. катаме сатта? сатисамбоджджхан̇го…пе… упеккха̄самбоджджхан̇го’’ти. евам̣ вутте а̄йасма̄ уда̄йӣ бхагавантам̣ етадавоча – ‘‘катхам̣ бха̄вита̄ ну кхо, бханте, сатта боджджхан̇га̄, катхам̣ бахулӣката̄ тан̣хаккхайа̄йа сам̣ваттантӣ’’ти?

‘‘идха, уда̄йи, бхиккху сатисамбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣ випулам̣ махаггатам̣ аппама̄н̣ам̣ абйа̄паджджам̣ [абйа̄паджджхам̣ (сӣ. сйа̄. пӣ.)]. тасса сатисамбоджджхан̇гам̣ бха̄вайато вивеканисситам̣ вира̄ганисситам̣ ниродханисситам̣ воссаггапарин̣а̄мим̣ випулам̣ махаггатам̣ аппама̄н̣ам̣ абйа̄паджджам̣ тан̣ха̄ пахӣйати. тан̣ха̄йа паха̄на̄ каммам̣ пахӣйати. каммасса паха̄на̄ дуккхам̣ пахӣйати…пе… упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣ випулам̣ махаггатам̣ аппама̄н̣ам̣ абйа̄паджджам̣. тасса упеккха̄самбоджджхан̇гам̣ бха̄вайато вивеканисситам̣ вира̄ганисситам̣ ниродханисситам̣ воссаггапарин̣а̄мим̣ випулам̣ махаггатам̣ аппама̄н̣ам̣ абйа̄паджджам̣ тан̣ха̄ пахӣйати тан̣ха̄йа паха̄на̄ каммам̣ пахӣйати. каммасса паха̄на̄ дуккхам̣ пахӣйати. ити кхо, уда̄йи, тан̣хаккхайа̄ каммаккхайо, каммаккхайа̄ дуккхаккхайо’’ти. чхат̣т̣хам̣.